Mádenıet jáne sport mınıstrliginiń uıymdastyrýymen "Meniń Qazaqstanym" halyqaralyq mýzykalyq chellendji bastaldy, - dep habarlaıdy Egemen.kz.
Chellendj ataqty kompozıtor, qazaq estradasynyń negizin salýshylardyń biri, Qazaqstannyń halyq ártisi, QR Ánurany áýeniniń avtory Shámshi Qaldaıaqovtyń týǵan kúnine arnalady. Atalǵan sharany úılestirý "Qazaqkonsert" uıymy janyndaǵy "Konserttik-gastroldik qyzmet ortalyǵyna" júktelgen.
Jobany "qazaq mýzykasynyń altyn daýysy", án áleminiń ardageri Bıbigúl Tólegenova bastady. Shámshi Qaldaıaqovtyń úzeńgiles-zamandasy Bıbigúl Ahmetqyzy sazgerdiń "Qaıyqta" ánin eń alǵash oryndaǵan edi. Talant ıesi jastyq shaǵyn eske alyp, atalǵan ándi tyńdarmandaryna taǵy bir márte usyndy.
Bıbigúl Tólegenova "Meniń Qazaqstanym" halyqaralyq mýzykalyq chellendjin jalǵastyrý estafetasyn belgili ánshi Álibek Dinishevke, Qazaqstannyń Halyq artısi Roza Rymbaevaǵa, KSRO jáne Qazaqstannyń Eńbek sińirgen sport sheberi, QR eńbek sińirgen qaıratkeri Dáýlet Turlyhanovqa, sondaı-aq, alys-jaqyn shet elderdegi qandastarymyzǵa joldady.
Atalǵan estafetany qabyl alýshylar jobany qoldap, jalǵastyrýǵa belsendilik tanytýda. Máselen, Roza Rymbaeva kezekti án marafonyn qazaq operasynyń qos juldyzy Nurjamal Úsenbaeva men Maıra Muhamedqyzyna jáne jas ánshi Ámirege joldamaqshy.