Qazaq eli qaı kezde de toı toılaǵandy, toıǵa barǵandy jaqsy kórgen ǵoı. Búginge deıin «bar tapqanymyzdy toıǵa shashyp» keldik. Endi burynǵydaı shashylýdy qazirgi pandemııa jaǵdaıy keshirmeıdi. Álemdi jaýlaǵan indet jaǵadan alyp turǵanda, el azamattary vırýsqa da qaramaı toı toılap, arty qaıǵyly oqıǵamen aıaqtalyp jatqanyn kózimiz kórdi, qulaǵymyz estidi.
Iá, árıne toı – aǵaıynnyń basyn qosatyn, baýyrmaldyqty nyǵaıtatyn, ár otbasynyń qýanyshyn pash etetin saltanat. Biraq toı-jıyndy, jón-josyqsyz shashylýdy, ysyrapshyldyqty doǵaratyn kez keldi dep esepteımin. Qazirgi qalyptasqan jaǵdaıda jıǵan-tergenimizdi toıǵa emes, bilimge, jańalyqqa jany qumar jastardyń ǵylym jolyna túsýge, solardy yntalandyrýǵa nemese baspanaly bolýyna jumsaǵanymyz abzal.
Deı turǵanmen, toı toılaýǵa túbegeıli qarsy emespin. Tek toıdyń formatyn ózgertý kerek. Áıtpese, álemde toı ótkizýden jarysqa túspeı-aq bas báıgeni alatyn halqymyz toıǵa zańmen tyıym salynsa da, toılaıtyndar tabylady. Sondyqtan toı ıeleri burynǵydaı 500-600 adam emes, tek eń jaqyn degen et-jaqyndaryn ǵana shaqyryp, záýlim-záýlim toıhanalarda emes, úı jaǵdaıynda ótkizse deımin. Áıtpese toıǵa keletin 500-600 qonaqtyń jartysyn keıde ózimiz de tanymaı jatamyz.
Keıingi jyldary elimizde toıdy qýanysh úshin emes, bir-birimen jarysý úshin ótkizetinder kóbeıdi. Bul jaǵdaıy bar, qaltaly azamattarǵa túk qıyn sharýa emes. Al jurttan qalmaıyn dep tyrashtanyp, qorasyndaǵy sońǵy malyn satyp, ol jetpese bankten kredıt alyp toı jasaıtyndar qanshama. Toı toılaý arqyly damıtyn bolsaq, Qazaqstan áldeqashan alpaýyt elderdi shań qaptyryp ketetin edi. Damyǵan elderdiń qataryna toı-jıyn arqyly emes, bilimdi urpaq tárbıeleý arqyly ǵana qosylatynymyzdy túsinsek deımiz.
Jýyrda Prezıdentimiz Qasym-Jomart Kemelulynyń ózi de: «Toı qýalaıtyn emes, oı qýalaıtyn kezeńmen betpe-bet keldik. Bul dáýir – aqyl-oıdyń, ǵylym men bilimniń, eńbektiń dáýiri!» dep aıtqan bolatyn. Men de Prezıdenttiń aıtqanyn tolyq qoldaımyn.
Baqtııar ARTAEV,
Afına Olımpıadasynyń chempıony