Qazaqstan Prezıdenti Qasym-Jomart Toqaev Parlament Palatalarynyń birlesken otyrysynda "Jańa jaǵdaıdaǵy Qazaqstan: is-qımyl kezeńi" atty Joldaýyn jarııalap, elimizdi odan ári damytý strategııasymen tanystyrdy. Álemdik buqaralyq aqparat quraldary Memleket basshysynyń Joldaýynda aıtylǵan birqatar bastamaǵa aıryqsha nazar aýdardy. Sol jarııalanymdardyń birqataryn oqyrmanǵa usynamyz.
"Vestnık Kavkaza" gazeti 2021 jyldan bastap Qazaqstanda "Ańsaǵan sábı" arnaýly baǵdarlamasy iske qosylatynyn habarlaǵan. Sondaı-aq Qazaqstan Prezıdentiniń Úkimetke "Eko" baǵdarlamasymen kvotany 7 ese kóbeıtýdi tapsyrǵanyn jazady.
"Elimizde ókinishke qaraı, árbir altynshy otbasy bala súıý baqytynan aıyrylǵan. Áleýmettik saýal salý qazaqstandyqtardyń shamamen 20 paıyzy "bul ajyrasýǵa úlken sebep" sanaıtyndyǵyn kórsetti", - delingen basylym habarlamasynda.
Reuters halyqaralyq agenttigi Qasym-Jomart Toqaev sheneýnikterdi 25 paıyzǵa qysqartýdy tapsyrǵanyn, memlekettik qyzmettiń júıesi qaıta qaralatynyn jazdy. "Pandemııa men memlekettik organdaǵy kóptegen qyzmetkerdi qashyqtan jumys isteý rejımine aýystyrý memapparatty qysqartý kerek ekenin kórsetti. Memlekettik apparat pen kvazımemlekettik sektoryn qysqartý merzimin jyldamdatýdy tapsyramyn. Bıyl olardyń sanyn 10 paıyzǵa qysqartý qajet. Kelesi jyly taǵy 15 paıyzǵa qysqartý kerek. Osylaısha, sheneýnikterdi 25 paıyzǵa qysqartý tapsyrmasyn 2021 jyly sheship bolamyz. Nátıje men sıfrlandyrýǵa baılanysty taǵy da qysqartý máselesin qaraımyz. Únemdelgen qarajat arqyly qalǵan qyzmetkerlerdiń jalaqysy arttyrylady",- dep habarlady agenttik.