Memleket basshysy Qasym-Jomart Toqaevtyń bıyl Saıası qýǵyn-súrgin jáne asharshylyq qurbandaryn eske alý kúnine oraı arnaıy úndeý jarııalaǵany málim. Úndeýinde Prezıdent Q.Toqaev táýelsizdiktiń alǵashqy jyldarynan bastalǵan tarıhı ádildikti qalpyna keltirý jumystaryn aıaqtap, saıası qýǵyn-súrgin qurbandaryn aqtaý úshin arnaıy memlekettik komıssııa qurýdy tapsyrǵanyn aıtty.
«Biz jazyqsyz jazalanǵandardyń árqaısysyn este saqtaý arqyly ǵana kemel keleshekke jol ashamyz», dedi Memleket basshysy. Qasym-Jomart Kemelulynyń bul sheshimi keńestik dáýirdegi zańsyzdyqtar kezeńinde qurban bolyp, esimderi men halyq ıgiligi úshin atqarǵan isteri umyttyrylǵan jandardy eske alý isine jańa serpin berýde. Jazýshy jáne tarıhshy Beıbit Qoıshybaevtyń jaqynda «Rýh» baspasynan shyqqan «Eli súıgen Aq Baıseıit» atty kitaby osy oraıdaǵy sony serpilistiń bir kórinisi ekenine kúmán joq.
Qazaq ult-azattyq qozǵalysyna qatysýshylardyń alǵashqy leginde bolǵan Baıseıit Ádiluly Keńes ókimeti Alash qaıratkerlerine qarsy júrgizgen repressııanyń alǵashqy tolqynynda oqqa ushty. Kámpeske naýqanynan keıin ile-shala sońyna túsken qarýly jasaq onyń boı tasalaǵan úıin qorshaýǵa alyp, atqylaǵan shaqta opat boldy. Áskerılerdiń baqylaýymen jer qoınyna berildi. Esimi «Alash isi» tergeýlerinde ǵana atalyp, qalyń jurtshylyq úshin sodan beri jabyq jaǵdaıda jatty. Biraq ony qadir tutatyndar men biletinder umytpaı, toqsan jyldan keıin súıegin aýyldastarynyń mekenine ákelip, qaraly-saltanatty túrde qaıta jerledi. Osy oqıǵaǵa baılanysty ázirlengen jınaqqa Keńesterdiń 1920 jylǵy quryltaıshy sezinde saılanǵan Sovettik Sosıalıstik Qazaq Respýblıkasynyń alǵashqy Ortalyq atqarý komıteti (KazSIK) músheleri aǵaıyndy Baıseıit jáne Dinmuhamed (Dinshe) Ádilovter men olardyń úzeńgilesteri týraly zertteýler jáne qyzyqty da tanymdy estelikter toptastyrylǵan.
Kitap Otan tarıhymen áýestenetin kópshilikke, zertteýshilerge, jastarǵa, stýdentter men oqýshylarǵa arnalǵan.
Baljan HABDINA,
Baspa jáne polıgrafııa isiniń qaıratkeri