Búgingi kúnge deıin Almaty oblysynda syıymdylyǵy 25,7 myń bas bolatyn 82 sút fermasy bar. Jyl basynan beri Qaratal, Ile, Eńbekshiqazaq jáne Panfılov aýdandarynda syıymdylyǵy 2400 bas bolatyn 6 taýarly-sút fermasy iske qosyldy, dep habarlaıdy Egemen.kz Almaty oblysy ákiminiń baspasóz qyzmetine silteme jasap.
Oblystyq aýyl sharýashylyǵy basqarmasynyń málimetinshe, jyl sońyna deıin oblysta syıymdylyǵy 2 myń basqa arnalǵan 6 taýarly-sút fermasyn paıdalanýǵa beriledi dep josparlanǵan. 8 aıdyń qorytyndysy boıynsha oblysta 547,5 myń tonna sút óndirildi. Onyń 89,0 myń tonna súti taýarly-sút fermasyna tıesili.
О́tken jyly oblysta 788,2 myń tonna sút óndirilgenin, onyń ishinde 87,2 myń tonnasy taýarly-sút fermalarynda óndirilgenin atap ótken jón. 2020 jylǵa arnalǵan sút óndirý jospary 816,7 myń tonnany quraıdy. Onyń ishinde taýarly-sút fermalarynyń úlesi 92,0 myń tonna.