Eńbek jáne halyqty áleýmettik qorǵaý mınıstrligi baspasóz qyzmetiniń habarlaýynsha, 1,6 myńǵa jýyq medısına qyzmetkeri COVID-19 ınfeksııasyn jáne pnevmonııany juqtyrýyna baılanysty MÁSQ-tan tólemder aldy.
COVID-19-ben kúresýge tartylǵan 1581 medısına qyzmetkeri koronavırýstyq ınfeksııany nemese vırýstyq pnevmonııany juqtyrǵan jaǵdaıda Memlekettik áleýmettik saqtandyrý qorynan beriletin birjolǵy áleýmettik tólemdi aldy. Sondaı-aq MÁSQ aýrýdyń saldarynan qaıtys bolǵan 22 medısına qyzmetkeriniń týystaryna tólemder aýdardy.
Budan buryn habarlanǵandaı, joǵaryda atalǵan tólem tólenetin medısına qyzmetkerlerin óńirlerdiń jáne respýblıkalyq mańyzy bar qalalardyń densaýlyq saqtaý basqarmalary janyndaǵy arnaıy komıssııalar aýyrǵan medısına qyzmetkerlerin tekserý nátıjeleri negizinde anyqtaıdy. О́tinimderdi jınaqtaýdy Densaýlyq saqtaý mınıstrligi júzege asyrady, odan keıin ótinimder elektrondy is maketterin qalyptastyrý úshin «Azamattarǵa arnalǵan úkimet» memlekettik korporasııasy» KeAQ-qa beriledi, keıin tólem taǵaıyndaý úshin MÁSQ-qa jiberiledi.
16 qyrkúıek saǵat 9.00-degi jaǵdaı boıynsha MÁSQ COVID-19 nemese vırýstyq pnevmonııa juqtyrǵan 1581 medısına qyzmetkeriniń ótinishi boıynsha jáne aýrýdyń saldarynan qaıtys bolǵan 22 medısına qyzmetkeriniń ótinishi boıynsha aqshalaı qarajatty taǵaıyndaý men tóleýdi júzege asyrdy.
О́ńirler bólinisinde medısına qyzmetkerlerine COVID-19 nemese vırýstyq pnevmonııany juqtyrý jaǵdaıyna tólemderdiń eń kóp sany Almaty (350) jáne Nur-Sultan qalalarynan (309), Qaraǵandy (113) jáne Aqmola (107) oblystarynan júrgizildi.
Eske sala keteıik, Eńbek jáne halyqty áleýmettik qorǵaý mınıstri men Densaýlyq saqtaý mınıstriniń 9 sáýirdegi «Densaýlyq saqtaý uıymdarynyń COVID-19 koronavırýstyq ınfeksııasyna qarsy kúres jónindegi epıdemııaǵa qarsy is-sharalarǵa tartylǵan qyzmetkerleri atalǵan ınfeksııany juqtyrǵan nemese odan qaıtys bolǵan jaǵdaıda olarǵa birjolǵy áleýmettik tólemdi júzege asyrý qaǵıdalaryn bekitý týraly» birlesken buıryǵyna aǵymdaǵy jyldyń 22 shildesinde engizilgen ózgeristerge sáıkes kórsetilgen tólem: koronavırýstyq ınfeksııa nemese vırýstyq pnevmonııa juqtyrǵan medısına qyzmetkerlerine – 2 mln teńgeden; al COVID-19 koronavırýstyq ınfeksııasyn juqtyrǵannan, vırýstyq pnevmonııamen aýyryp qaıtys bolǵan jaǵdaıda olardyń otbasyna – 10 mln teńge kóleminde tólenedi.