Almaty oblysy aýmaǵyndaǵy Altynkól shekaralyq temirjol stansııasy Qazaqstan men Qytaı qaqpasyn dánekerlep turǵan aýqymdy nysan. Osydan bes jyl buryn paıdalanýǵa berilgen mundaǵy «KTZE-Khorgos Gateway» Qurǵaq porty da strategııalyq tıimdi núktede ornalasqan Ortalyq Azııadaǵy eń iri Qurǵaq port sanalady. Shekara shebindegi tirshiligi qyz-qyz qaınap jatqan qos nysannyń sońǵy segiz aıdaǵy jumys kórsetkishi tilshiler nazaryna usynyldy.
Táýlik boıy tynymsyz jumys isteıtin Qurǵaq portta Qytaıdan Eýropaǵa baǵyttalǵan túrli taýarlar tıelip, tıisti meken-jaıǵa jóneltiledi. Negizinen nysanda jumys isteıtin 180 azamattyń barlyǵy derlik jergilikti turǵyndar. Qurǵaq port aýmaǵynda jalpy aýdany 102,8 ga joǵary klasty logıstıkalyq servısti qamtamasyz etý úshin uzyndyǵy 24 shaqyrym temirjol men 6 kirme jol, birjolǵy saqtaýǵa arnalǵan 18 myńnan astam mamandandyrylǵan konteınerlik alań ornalasqan. Odan bólek eki birdeı ýaqytsha saqtaý qoımasy jumys isteıdi. Onyń bári zamanaýı sońǵy úlgidegi avtomattandyrylǵan tehnıkamen jabdyqtalǵan. Mundaǵy qyzý jumys indet kezinde de bir sát toqtamapty. О́ıtkeni halyqqa kúndelikti qajetti taýarlardyń negizgi legi Qytaı shekarasyndaǵy dál osy «Qorǵas – Shyǵys qaqpasy» arqyly jetkizilgen.
Búgingi tańda Qytaıdan Qazaqstanǵa keletin ımport sany 20 paıyzdy qurasa, Qazaqstannan eksporttalatyn taýar 20-25 paıyz kóleminde. Tranzıttik elder boıynsha Qazaqstannyń taýar ótkizý jyldamdyǵy táýligine 1100 shaqyrymnan astam. Aldaǵy ýaqytta muny 1500 shaqyrymǵa jetkizý kózdelip otyrǵan kórinedi.
Jaýapty mamandardyń aıtýynsha, Qytaıdan Eýropaǵa, Reseıge jáne Ortalyq Azııaǵa baratyn marshrýttar – dástúrli túrde Qazaqstan aýmaǵy arqyly ótetin eń suranysqa ıe baǵyttar sanatynda.
"2020 jylǵy qańtar – tamyz aıynda Qytaı – Eýropa – Qytaı baǵyty boıynsha tasymaldaý kólemi 306,6 myń JFE qurady, bul 2019 jylǵy uqsas kezeń kólemderimen salystyrǵanda 62% – ǵa ósti. Qytaı – Ortalyq Azııa-Qytaı baǵyty boıynsha ósim 29% - dy nemese 149,2 myń JFE qurady. Sondaı-aq esepti kezeńde Qytaıdan Reseıge 31,2 myń JFE tasymaldandy, ósim ótken jyldyń uqsas kezeńimen salystyrǵanda 47% - ǵa artyp otyr. Eger Altynkól stansııasy men Qurǵaq port arqyly tasymaldanatyn júkterdiń nomenklatýrasy týraly aıtatyn bolsaq — bul halyq tutynatyn taýarlar, metaldar, hımıkattar jáne gabarıtti emes júkter, mysaly, aǵymdaǵy jyldyń qyrkúıek aıynda "KTZE-Khorgos Gateway" Qurǵaq portynyń tıeý termınalyn iske qosý arqyly Qytaıdan Túrikmenstanǵa 300 gabarıtti emes tehnıka – John Deere aýyl sharýashylyǵy kombaındary jiberildi. Aıta keteıik, John Deere kompanııasy 2017 jyldan beri aýyl sharýashylyǵy tehnıkasyn tasymaldaý isinde bizge senim bildirip keledi. Osy kezeńde biz 1 474 kombaınnyń qaýipsiz tasymaldanýyn júzege asyrdyq", – deıdi "KTZ Express" AQ Logıstıka jónindegi Vıse-prezıdenti Nurlan Igembaev.
Nurlan Igembaevtyń sózinshe, Altynkól stansııasy arqyly bıyl birqatar jańa konteınerlik marshrýttar iske qosylǵan. Bul Szınhýa (QHR) – Baký (Ázirbaıjan), Sıan (QHR)- Izmıt (Túrkııa) Transkaspıı halyqaralyq kólik baǵyty boıynsha, Chensıan (QHR) – Jodıno (Belorýssııa), Szınan Nan (QHR) – Qypshaq (Túrikmenstan), Túrkmenbashy (Túrikmenstan) – Sındao (QHR), sondaı – aq Altynkól - Máskeý túıini stansııasynyń turaqty konteınerlik servısi.
«KTZ Express» AQ kompanııasy búgingi tańda eń qolaıly tarıftik sharttardy jasap, Qazaqstan arqyly ótetin barlyq baǵyttardaǵy júkterdiń jyldamdyǵy men saqtalýynyń tolyq parametrlerin ustanyp otyr. Uzyndyǵy 3128 km quraıtyn Altynkólden Aqtaý portyna deıingi ýchaskeni konteınerler úsh táýlik ishinde ótse, 2019 jylǵy 16 sáýirden bastap «Qazaqteńizkólikfloty» kompanııasynyń fıderlik kemesi apta saıyn Baký portyna 210-ǵa jýyq konteıner jetkizedi, sol jerden júkter temir jol arqyly Grýzııa men Túrkııaǵa jóneltiledi. Mysaly, qytaılyq Sıannan túrkııanyń Stambýlyna deıingi sapardyń jalpy ýaqyty 16 kúndi qurasa kerek.
Zaman talabyna saı tasymaldaý qyzmetimen qatar júkterti tekserý, tıeý, saqtaý máselesi de júıeli jolǵa qoıylǵan. Máselen Qytaıdan keletin 56 vagondaǵy júkti ózimizdiń vagondarǵa qaıta tıeý 1 saǵattyń aınalasynda atqarylady. 15 myń konteınerdi bir ýaqytta qabyldap, bir kúnde 15 poıyzdy qaıta jóneltýdiń arqasynda barlyq baǵyt boıynsha tranzıt kólemi 40 paıyzǵa deıin ósken. «KTZE-Khorgos Gateway» Qurǵaq portynyń dırektory Ibragım Manabaev, aǵymdaǵy jyldyń 8 aıyna josparlanǵan 23 myń tonna júkti eki ese mólsherde oryndap, 46 myń tonna júk jóneltilgenin aıtady. 1350 poıyzdyń 40 paıyzy Eýropaǵa, 26 paıyzy О́zbekstanǵa jiberilgen.
Altynkól stansııasy bastyǵynyń mindetin atqarýshy Nurjan Qurmanáliulynyń shekaralyq júk stansııasynyń jumysy týraly bergen málimetine súıensek, bıylǵy jyldyń 8 aıynda stansııa arqyly barlyq sanıtarlyq-epıdemıologııalyq normalarǵa sáıkes 1551 konteınerlik poıyz ótken. Bul ótken jyldyń osy kezeńimen salystyrǵanda 110,7%-ǵa artyq. Tar tabandy jol boıynsha 2600 júk poıyzy, keń tabandy jol boıynsha 3500-den astam poıyz qabyldanǵan.