AQSh-tyń demokratııalyq partııasynan prezıdenttikke úmitker Djozef Baıden prezıdent Donald Tramptyń koronavırýs juqtyrýyna baılanysty kelesi pikirsaıysty keıinge qaldyrýǵa nıetti. Bul týraly demokratııalyq saılaýaldy shtabtyń ókili Keıt Bedıngfıld ABC telearnasynda aıtty, dep habarlaıdy Egemen.kz.
"Biz pikirtalas belgilengen kúni ótýi kerek dep sanaımyz, biraq bul kóptegen faktorlarǵa, eń aldymen prezıdent Tramptyń densaýlyq jaǵdaıyna baılanysty. Biz onyń tezirek saýyǵyp ketýin tileımiz", - dedi K. Bedıngfıld.
Tramp pen Baıden pikirsaıystarynyń birinshi kezeńi seısenbi kúni Klıvlendte ótti. Qarsylastarǵa moderatordyń suraǵyna jaýap berý úshin eki mınýttan berildi. Olardyń ekinshi pikirsaıysy 15 qazanda Maıamıde, úshinshisi 22 qazanda Nashvıllde ótedi. Al jalpy saılaý 3 qarashada AQSh-ta ótedi dep josparlanýda.
Eske sala keteıik, 2 qazanda Donald Tramp Twitter paraqshasynda áıeli ekeýiniń koronavırýs juqtyrǵanyn habarlaǵan edi. Budan soń, Aq úıde memleket basshysymen birge tyǵyz qarym-qatynasta bolǵan qyzmetkerlerdiń barlyǵy karantınge jiberildi. Koronavırýs juqtyrǵan Prezıdenttiń áıeli Melanııa Tramptyń syrqaty jeńil ótip jatqan kórinedi. Ol emhanada emes, Aq úıde emdelip jatyr.
Sońǵy kúnderi koronavırýs Prezıdenttiń kómekshisi Hoýp Hıks, Tramptyń burynǵy keńesshisi Kellıenn Konýeı, úsh respýblıkalyq senator, Respýblıkalyq partııanyń ulttyq komıtetiniń tóraǵasy Ronna Makdenıel, Aq úı basshysynyń saılaý naýqanynyń menedjeri Ýılıam Stepın, Tramptyń jeke kómekshisi Nık Lýnadan jáne prezıdent pýlyndaǵy úsh jýrnalıstten tabyldy.