Jarma aýdany, Shalabaı aýyldyq okrýginiń ákimi Janar Esembaeva respýblıkalyq «Úzdik aýyl ákimi» baıqaýynda top jarǵandardyń ishinde jalǵyz názik jan.
Sonaý Atyraýdyń qyzy osydan otyz jyl buryn Jarma aýdanyna, Esembaevtardyń shańyraǵyna kelin bolyp túsken. Sodan beri Shalabaı aýylynan taban aýdarmaı eńbek etip keledi. Búginde Janar Sákenqyzy Shalabaı aýylynyń bildeı ákimi.
– 1991 jyly kelin bolyp tústim. Joldasym ekeýmiz bir ul, eki qyz tárbıelep ósirdik. Alǵashynda mektepte hımııa-bıologııadan sabaq berdim. Keıin memlekettik qyzmetke aýysyp, 2009 jyldan beri Shalabaı aýyldyq okrýgin basqaryp júrmin, – deıdi Janar Sákenqyzy.
Toǵyz joldyń torabynda turǵan Shalabaı aýylynyń ózinde ǵana 266 aýla, on shaqty úıli stansasy bar. Mańaıyndaǵy aýyldar qysqaryp ketken. Halyqtyń tirshilik kózi – mal sharýashylyǵy. Mundaǵy sharýa qojalyqtardyń kóbi asyl tuqymdy mal ósirýmen aınalysady. Soǵan qaraı «Atameken» kásipkerlik palatasynyń kómegimen 120 mln teńgege asyl tuqymdy mal basyn kóbeıtý maqsatynda arnaıy zerthana salynyp jatyr.
Aýyl ákiminiń aıtýynsha, Shalabaıda bos turǵan úıler joq. Halyqtyń turmys sapasy táýir. Turǵyndardy negizinen «Baqyrshyq taý-ken óndirý kásiporny», temir jol stansasy, «Shalabaı» syndy sharýa qojalyqtar jumyspen qamtyp otyr. Qalaǵa qonys aýdaryp jatqandar neken-saıaq. О́ıtkeni oblys ortalyǵyna deıin 105 shaqyrym ǵana. Qajet bolsa, kúnbe-kún baryp kelýlerine bolady.
Aýyl jastary úshin «Shalabaı» JShS basshylyǵy bos turǵan azyq-túlik dúkenin jóndep, «Shalabay.kz» atty jattyǵý zalyn ashyp qoıǵan. Osy ýaqyt ishinde aýyldy abattandyrý úshin «Baqyrshyq taý-ken óndirý kásiporny» jáne «Shalabaı» JShS-men memorandýmǵa otyryp, kóptegen jumystar atqarylǵan. Kelisim-shart boıynsha «Baqyrshyq taý-ken óndirý kásiporny» aýyldyq jastarǵa arnap bı alańyn, zamanǵa saı oıyn alańyn salyp bergen. Sondaı-aq dárigerlik ambýlatorııaǵa kúrdeli jóndeý jumystary júrgizilip, medısınalyq quraldarmen jabdyqtaldy. Eki jaqty kelisimniń arqasynda aýyldyń bes kóshesi túngi ýaqytta samaladaı jaraqyrap tur. Kóshe-kóshege sý qubyry da tartylǵan. Al baǵdarlamaǵa enbeı qalǵan bir kósheniń máselesin aýyl ákimi demeýshilerdiń kómegimen sheshken.
– Aýylymyzda aralas orta mektebimiz bar. Endi jastar alańsyz jumys isteýi úshin balabaqsha kerek. «Úzdik aýyl ákimi» baıqaýyna da 30 oryndyq balabaqsha ashý týraly jobamdy usynǵan edim. «Shalabaı» JShS balansynda turǵan dámhanany balabaqshaǵa laıyqtap jóndesek, jeti adamǵa jumys orny ashylar edi, – deıdi Janar Esembaeva.
Aýyldyq okrýg ákimi alpys jyl jóndeý kórmegen aýyl ishindegi joldardy jóndeýdi de josparlap otyr. Ol úshin 27 mln teńgege jobalyq smetalyq qujatyn daıyndap qoıǵan. Shaǵyn fýtbol alańyn ashýdy da oılastyryp júr.
Minekı, Janar Sákenqyzy «Úzdik aýyl ákimi» baıqaýyna júzege asqan jumystar men jospardaǵy jobalardy oblysqa, odan ótip respýblıkaǵa usynǵan. «Men nege «Úzdik aýyl ákimi» ataǵyna laıyqpyn?» taqyrybynda esse jazǵan. Nátıjesinde, 14 oblystyń ishinen iriktelip shyǵyp, úzdik úshtikten kórindi.
Konkýrstyń alǵashqy kezeńinde oblystyń Ádep jónindegi ýákilderimen birlesip, arnaıy saýaldama ázirlendi, turǵyndardyń pikiri eskerildi. Ákimderdiń halyqpen keri baılanysty jolǵa qoıý jónindegi qyzmeti baǵalandy, sol boıynsha qol jetkizgen nátıjeleri zerdelendi.
Memleket basshysy Qasym-Jomart Toqaevtyń «Halyq únine qulaq asatyn memleket» tujyrymdamasyn iske asyrý, ıaǵnı halyqpen keri baılanys ornatý jáne máselelerdi ýaqtyly sheshý maqsatynda aýyl turǵyndary úshin «Ashyq ákimdik», «Ashyq dıalog» formattarynda toqsan saıynǵy kezdesýler ótkizý tájirıbesi engizildi.
Memlekettik qyzmet isteri agenttiginiń bastamasymen «Rýhanı jańǵyrý» baǵdarlamasy aıasyndaǵy «Úzdik aýyl ákimi» respýblıkalyq baıqaýy óz máresine jetip, júldegerler marapattaldy. Nátıjesinde, aýyly úshin aıanbaı eńbek etip júrgen Shalabaı aýyldyq okrýginiń ákimi Janar Esembaeva júldeli úshinshi oryndy qanjyǵasyna baılady.
Shyǵys Qazaqstan oblysy,
Jarma aýdany