Báıge túrlerinen Elbasy kýbogy ótti

Birinshi bolyp 7 shaqyrymdyq jarys jolyna shyqqan jorǵalardyń ozyp kelgen alǵashqy 3-eýine báıge buıyrdy. Birinshi oryn Aıakóz Bıkenova baptaǵan Petropavl qalasyndaǵy «Qulager» atshabarynyń jylqysy «Fılıps» esimdi jorǵaǵa, kelesi oryndar soltústikqazaqstandyq Arman Qabdollaevtyń menshigi «Revansh» atty kúlikke jáne Aqmola oblysy Bulandy aý­danynyń turǵyny Farhat Jaılıev tizgin­degen «Edelveıs» atty jorǵaǵa buıyrdy.

Kelesi syn 9 shaqyrymdyq qunan báı­gege 24 júırik qatysyp, birinshi oryn Almaty oblysy Jambyl aýdany­nan kelgen Sultan Jolanulynyń júı­rigi «Talhız» atty tory baıtaldyń mańdaıyna jazylsa, ekinshi oryn Súletaı Nurbolat tizgindegen «Babýr Amır» esimdi qunanǵa, úshinshi oryn Almaty qalasynyń turǵyny Oljas Ábdihamıt baptaǵan «Zamanaı» atty aǵylshyn jylqysyna buıyrdy.

Odan keıin kishi alaman, ıaǵnı 16 sha­qy­­rymdyq top báıge júırikteri ja­rys jolyna shyǵyp, aýyzdyǵymen alys­­qan 27 sáıgúliktiń ishinen Alma­ty obly­synyń Qarasaı aýdanynan áke­lingen «Qar­lyǵashtyń» (ıesi – Seke­naı Bóbekbaı) mańdaıy jarqyrap birinshi kelse, odan keıingi oryndardy Mańǵystaý oblysynyń turǵyny Shadrah Ermekbaıulynyń «Aq­sholpan» atty tory bıesi men Almaty ob­lys­ynyń Jambyl aýdanynan kelgen Sul­tan Jolanulynyń taza qandy qarageri bólisti.

«Báıgeniń kórki – alaman» de­gen­deı, 25 shaqyrymdyq jarys jolyna ár taraptan qosylǵan 31 júırik ba­­ǵyn synady. Bulardyń arasynda úl­­ken báıgelerden bás alyp júrgen Qara­ǵan­­dynyń «Baqtorysy», Almatynyń «Qara­tor­ǵaıy» men «Nurtóbeli», Nur-Sultannyń «Buı­ryǵy», Oraldyń «Bektory», Jam­byl­dyń «Nurıslamy», Almaty obly­synyń «Jetisýy», Pav­lodardyń «Senimi» syndy bas júldeden dámeli sáı­gúlikter qara jerdiń apshysyn qýyr­dy. Sonymen alǵashqy bolyp tizgin ustatqan 7 júırikke júlde berildi.

Birinshi oryn Meıirlan Nurbolatov tiz­gindegen «Baqtory» atty júırikke buıyr­dy. At ıesi – Parlament Májili­siniń depýtaty Bekbolat Tileýhan. Ekin­shi oryndy Almaty oblysynyń Qarasaı aýdanynan kelgen taza qandy bes jasar kúreń bıe enshiledi. Iesi – Mádı Ora­za­lıev. Úshinshi orynǵa Nur-Sultan qala­synyń atynan shyqqan taza qandy tory dónen taban tiredi. At ıeleri – Nurdáýlet Ákimjanov pen Azamat Begalın.

Kelesi oryndar Almaty oblysyndaǵy Qarasaı aýdanynyń turǵyny áıgili atbegi Sekenaı Bóbekbaıdyń «Úshqońyryna», Qaraǵandy oblysynyń Qyzyljar stansasynan kelgen Bekzat Áınekbaevtyń kúreń qasqasyna, kómbeni kesip ótip jyǵylǵan Erjan Aqtasovtyń «Kókoınaǵyna» jáne Almaty oblysyndaǵy Qarasaı aýdanynan kelgen Sultan Jolanulynyń «Asý torysyna» buıyrdy.