Qazaqstan Respýblıkasynyń Tuńǵysh Prezıdenti – Elbasy kitaphanasynda «Qazaqstannyń 100 jańa esimi» jobasy jeńimpazdarymen onlaın kezdesý ótti. Oǵan elimizdiń túkpir-túkpirinen kelgen jastar qatysyp, Elbasy bastamasy retinde qabyldanǵan atalǵan jobanyń qoǵamǵa yqpaly jaıly aıtyp, aldaǵy josparlarymen bólisti.
Is-shara moderatory mekeme basshysy Ámirhan Rahymjanov,onlaın jıyndy ashyp, sóılegen sózinde: «Sizder – ózine senetin, birneshe tildi meńgergen, jahandyq aqparattyq qoǵamdastyqtyń tetigin ıgergen bilimdi, talantty, kreatıvti el jastarynyń ókilisizder. Elbasy kitaphanasy jas qazaqstandyqtardyń tárbıesi men bilimine basa mán berip, otandyq jáne halyqaralyq jobalardyń damýy men óristeýine belsendi atsalysady. Kitaphana saıtynda «Uly dala tarlandary» atty aqparattyq jobasy iske qosylǵan. Osynda «Qazaqstannyń 100 jańa esimi» jobasynyń fınalısterimen vıdeokezdesýler de bar» dedi.
Sodan keıin, atalǵan jobanyń qalaı damyp kele jatqany jaıly onyń kýratory Bıbigúl Qulaman tarqata aıtyp, sharany uıymdastyrýshy tarapqa alǵysyn bildirdi.
«Qazaqstannyń 100 jańa esimi» jobasy pandemııaǵa qaramastan jumysyn jalǵastyrýda. Elbasynyń bastamasymen qurylǵan joba jastardyń kóńilinen shyqty. Jastarymyz Qazaqstan atyn bar álemge tanytýda. Olardyń qatarynda, Imanbek Zeıkenov, Áıgerim Berekeshova, Aıjan Júzbaı, t.b. jastar bar», dedi B.Qulaman.
Joba fınalısi, 2016 jyly múddelesterimen birge «Teń múmkindikter álemi» qoǵamdyq birlestigin qurǵan Nurgúl Uljekova óz sózinde, biz qadamymyzdy nyq basyp kelemiz. Búginde birqatar qalada erekshe balalarǵa arnap tegin beıimdeý sport seksııalaryn ashtyq. Bul seksııalar búldirshinderdiń psıhologııalyq kedergilerin joıýǵa kómektesedi. Árkim teń múmkindikter áleminde ómir súrýi tıis. Bul túsiniktiń keń etek jaıǵanyn qalaımyz. Sondyqtan «Qazaqstannyń 100 jańa esimi» jobasyna qatysý jumysymyzdyń tıimdiligin arttyrýda jáne erekshe balalardyń máseleleri týraly qoǵamǵa meılinshe keńirek jetkizýde óte mańyzdy kezeń boldy dese, joba fınalısi Sáýlet Qaldashov, atalǵan joba jerin, elin shyn súıetin, onyń ıgiligi úshin aıanbaı ter tógip júrgen jastar esimin pash etti. Bul jandar – qoǵamnyń damýyna eńbek sińirip júrgen ulttyń janashyry, naǵyz patrıot azamattar. Qazaqstannyń jarqyn da beıbit keleshegi bizdiń qolymyzda, – dep óz oıymen bólisti.
Kezdesý sońynda mekeme basshysy Ámirhan Muratbekuly jıynǵa qatysqandary úshin jastarǵa alǵys bildirip, jobanyń ár jeńimpazynyń tájirıbesi men tarıhy qazaqstandyq jastar úshin myqty motıvasııa bola alatynyn alǵa tartty.