Bul kúnde birqazan jer betinen joıylyp bara jatqan qus retinde «Qyzyl kitapqa» engizilgen. Elimizde erte zamannan «kóldiń erkesi» atanyp ketken birqazannyń eki túri meken etedi. Olar, ásirese Kaspıı, Aral teńizderi men Balqash kóliniń mańynda kezdesedi. Alaıda jýyrda ǵana Jambyl oblysynyń aýmaǵyna da birqazan qusynyń kelgeni anyqtaldy.
Jaqynda Jýaly aýdandyq polısııa bólimine Dıhan aýylynyń shetindegi jyrada dene turqy úlken, erekshe qustyń ushyp kete almaı turǵany jóninde habarlama kelip túsken. Jergilikti turǵyndar birden munyń kádimgi qusqa uqsamaıtynyn baıqaǵan. Atalǵan jerge shuǵyl jetken polısııa qyzmetkerleri jyra boıynan óte álsiz jáne ózdiginen ushyp kete almaıtyn dármensiz birqazandy kórgen. Sonymen qatar Jýaly aýdanynyń orman jáne janýarlar dúnıesin qorǵaý mekemesinen mamandar shaqyrylǵan. Nátıjesinde munyń birqazan ekeni belgili bolǵan. Bul rette polısııa qyzmetkerleri sırek kezdesetin qusty qorǵap, aman alyp qaldy. Qutqarylǵan birqazan jýyq arada Shymkent qalasyndaǵy haıýanattar baǵyna jiberiledi.
Jalpy, birqazan qusynyń qasıeti týraly, sonymen qatar oǵan Muhammed (ǵaleıhıssalam) paıǵambardyń da duǵa etkeni ádebı derekterde kóp aıtylady. Paıǵambar Mádına qalasyna kóship baryp, sahabalarymen birge birinshi meshitti salatyn kezde sý tapshylyǵy bolypty deıdi. Biraq birqazan bir sát te damyl tappaı, kólden sý tasypty. Sonda qustyń eńbegine rıza bolǵan paıǵambar «Bizge kómektesseń, seni de Alla jarylqasyn. Úmbetterim qaı jerge qonystansa, sol jerde kóbeıgin», dep duǵa etipti deıdi. Ańyz boıynsha birqazannyń adamdar ómir súretin jerlerde, kólderde meken etetini sodan eken desedi...
Jambyl oblysy