Jýyrda «Nazarbaev ortalyǵynyń» jańa ǵımaratynda Nursultan Nazarbaev Qory men Memlekettik tildi damytý qory jarııalaǵan «Kim bilgish?» ıntellektýaldy-tanymdyq oıyny boıynsha joǵarǵy synyp oqýshylary arasynda uıymdastyrylǵan týrnırdiń fınaldyq oıyny men marapattaý rásimi ótti.
Daryndy balalardy anyqtap, olardyń tanymdyq qyzyǵýshylyqtaryn oıatý, oqýshylardyń mádenı jáne bilim deńgeıin kóterý, sondaı-aq mektep oqýshylary arasynda bos ýaqytty tıimdi uıymdastyrýǵa yqpal etýdi maqsat tutqan sharaǵa Nursultan Nazarbaev Qorynyń jobalaý ofısiniń jetekshisi Z.Túrkmenbaeva, Memlekettik tildi damytý qorynyń basshysy Azat Sháýeev qatysty.
Aıta keteıik, «Kim bilgish?» týrnıri 2016 jyldan bastap ótkizilip keledi. Bul oıyn sport, óner, álem, tarıh, tabıǵat, densaýlyq, ǵylym taqyryptaryndaǵy 40 000-nan astam suraqtardan turatyn tuńǵysh otandyq mobıldi qosymsha. Týrnır qatysýshylardyń tańdaýy boıynsha qazaq, orys, aǵylshyn tilinde júrgizildi.
Osy jyly oqýshylar respýblıkanyń ár óńirinen belsendilik tanytyp, 3000-ǵa jýyq mektep oqýshylary qatysty. Oıynnyń eki kezeńi onlaın rejimde, al qorytyndy fınal elordada ótkizildi. Osylaısha, qazaqtildi oıynshylar arasynda 1-orynǵa Túrkistan oblysynyń Kúltóbe negizgi orta mektebiniń 9-synyp oqýshysy Joltaı Gúlaıym, 2-orynǵa Aqmola oblysynyń №2 orta mektebiniń 9-synyp oqýshysy Qantaı Dáýlet, 3-orynǵa Aqmola oblysynyń №2 orta mektebiniń 10-synyp oqýshysy Asylbek Botagóz ıe boldy.
Al orystildi oıynshylar arasynda 1-oryn Pavlodar oblysy, Aqsý qalasy, №4 orta mektebiniń 11-synyp oqýshysy A.Sedovaǵa, 2-oryn Pavlodar oblysy, Aqsý qalasy, №8 orta mektebiniń 11-synyp oqýshysy M.Novakqa, 3-oryn Jambyl oblysy, Taraz qalasy, №3 mektep-lıseıiniń 11-synyp oqýshysy A.Orynbasarǵa tabystaldy. Týrnır jeńimpazdaryna «2020 jyldyń eń aqyldy oqýshysy» atty arnaıy dıplom men noýtbýk sııaqty baǵaly syılyqtar berildi.
«Is-shara balalarǵa básekelestik rýhyn sezinýge, ózderin jáne ózderiniń bilimderin dáleldeýge múmkindik berdi», dedi Memlekettik tildi damytý qorynyń basshysy A.Sháýeev.