Eńbek mınıstrligi Qazaqstan azamattarynyń jeke derekterin jınaý úshin Telegram-botty iske qosty degen aqparat jalǵan, dep habarlaıdy Egemen.kz.
Baspasóz qyzmetiniń málimetterine qaraǵanda, áleýmettik tólemder týraly aqparat alý úshin óz JSN-i men mobıldi telefon nómirin jiberýdi usynatyn i42500enbekkz_Bot telegram-boty ashylǵandyǵy týraly aqparat feık bolyp tabylady. QR Eńbek jáne halyqty áleýmettik qorǵaý mınıstrligi osy syndy telegram-boty iske qosqan joq. Eńbek mınıstrliginiń qyzmetkerleri azamattardan jeke deregin suramaıdy.
«Azamattardan feıkterge nazar aýdarmaýdy jáne tek resmı derekkózderdegi aqparatty paıdalanýdy suraımyz. Eske sala keteıik, jalǵan aqparat taratý zańmen qýdalanady»,-delingen habarlamada.