Astana IT University ǵylymı kitaphanasynda Qazaqstan Respýblıkasynyń Tuńǵysh Prezıdenti – Elbasy kitaphanasynyń qoldaýymen «N.Á.Nazarbaevtyń jyl saıynǵy Joldaýy aıasynda bilim berýdi jańǵyrtý jáne sıfrlandyrý» atty albomnyń tusaýy kesildi.
– Elbasy bastamalaryn júıeli beıneleıtin albomnyń jaryq kórýi – ortaq eńbegimizdiń jemisi, – dep mańyzdy jıynnyń betashar sózin aıtqan Elbasy kitaphanasynyń dırektory, saıası ǵylymdar doktory, professor Ámirhan Rahymjanov, Tuńǵysh Prezıdentimizdiń aldyńǵy qatarly memlekettermen birdeı ekonomıkalyq kóshbasshylyqqa qol jetkizýde sıfrly tehnologııalardy ıgerý men engizýiniń mańyzyna toqtaldy.
Odan keıin mańyzdy sharanyń máni jaıly pikir bildirgen Astana IT University rektory, tehnıka ǵylymdarynyń doktory Darhan Ahmed-Zakı, adamnyń parasaty boıyndaǵy bilimi – jeke qasıetteri men qundylyq baǵdarymen baǵalanatyny jaıly aıtyp: «Qazirgi aqparattyq kezeńde eldiń damýy da ulttyń zııatkerlik áleýetine tikeleı baılanysty bolyp otyr. Elbasy Joldaýlarynyń basty postýlaty osy aqıqatqa negizdeledi. Qazaqstannyń qoǵamdyq-saıası ómirine jańa uǵymdar engen soń tyń maqsattardy júzege asyrý isi jańa kózqarastardy qajet etti. Osy tusta Nursultan Ábishuly jastardyń aqyl-qaıratyna senim artyp, olardyń áleýetin jaqsartýǵa qolaıly jaǵdaı jasady. Nátıjesinde elimiz ekonomıkanyń, saıasattyń jáne qoǵamdyq qatynastardyń túrli salasyndaǵy ıntegrasııalyq prosesterge kóbirek tartyla bastady. Nazarlaryńyzǵa usynylyp otyrǵan albom – bul jumystardyń aıqyn kórinisi», dedi.
– Elbasy kitaphanasy men Astana IT University qurastyrǵan albomnan Nursultan Ábishuly kótergen bastamalardyń bári adamzat áleýetin jahandyq básekege qabiletti etýge baǵyttalǵanyn túsinip, elimizdegi bilim berý júıesiniń jer-jahan trendterimen tuspa-tus damyp kele jatqanyn ańǵarýǵa bolady. Albom Elbasynyń strategııalyq boljamyn mazmundaıtyndyqtan, óskeleń urpaqqa qundy derek bolmaq, – dedi is-sharanyń qadirli qonaǵy, Bilim jáne ǵylym mınıstriniń keńesshisi, saıası ǵylymdar doktory Amantaı Nurmaǵambetov.
Tusaýkeser barysynda Elbasy kitaphanasy men Astana IT University yntymaqtastyq memorandýmyna qol qoıdy.