Jańaózen qalasynda dástúrli sadaq atý mektebi ashyldy. Bul týraly qalalyq Dene shynyqtyrý jáne sport bóliminiń basshysy Jańabaı Aımaǵambetov málim etti, dep habarlaıdy Egemen.kz
Arnaıy ortalyqty mańǵystaýlyq mergen, sportshy Sánim Murat ashqan. Mektepte 50 sportshy jattyǵady. Olardyń eń kishisi – 7 jasta bolsa, úlkeni 57 jasta.
4 jeltoqsan kúni sadaq atýdan alǵashqy qalalyq ashyq týrnır ótti. Jarystyń maqsaty – jalpy ulttyq sport túrlerine qoǵamnyń qyzyǵýshylyǵyn arttyrý.
"Bul – óte jaqsy bastama. Aldaǵy ýaqytta osyndaı mektepter kóptep ashylsa ıgi. Jas býyndy otansúıgishtikke, patrıottyq rýhta tárbıeleý mańyzdy. Biz qazirgi tańda dástúrli sadaq atýdyń bedeli men reıtıngin kóterýdi jáne ony álemdik deńgeıdegi negizgi sport túrine aınaldyrýdy kózdep otyrmyz", dedi J.Aımaǵambetov.