Atyraý oblysynda ornalasqan Teńiz kenishindegi ınfeksııalyq stasıonarda vırýsty juqtyrǵan 200 naýqas em-dom qabyldap jatyr, dep habarlaıdy Egemen.kz
Oblystyq densaýlyq saqtaý basqarmasynyń baspasóz qyzmeti málimdegendeı, ótken táýlikte 28 adamnan koronavırýs ınfeksııasy anyqtalǵan. Onyń ishinde Atyraý qalasynyń 8 turǵyny men Teńiz kenishindegi 17 jumysshy bar. Sondaı-aq Qurmanǵazy aýdanynda turatyn 3 adamnan da qaýipti indettiń belgisi tabylǵan.
"Atyraý oblysynda ótken táýlikte koronavırýs ınfeksııasynan 48 naýqas emdelip shyqty. Qazir 136 adam úı jaǵdaıynda, oblystyq ınfeksııalyq stasıonarda 48, Inder, Qyzylqoǵa, Qurmanǵazy aýdandaryndaǵy stasıonarda 8 naýqas, al Teńiz kenishindegi ınfeksııalyq stasıonarda 200 naýqas em qabyldap jatyr", dep habarlady basqarmanyń baspasóz ókili.
Eske sala ketsek, buǵan deıin Teńiz kenishinde bir táýlikte 42 jumysshy indet juqtyrǵanyn habarladyq. Oǵan qosa, Teńiz kenishinde epıdemııalyq jaǵdaıdyń kúrt ýshyǵýyna baılanysty 7 jeltoqsanda karantındik shekteý sharalary kúsheıtilip, eki kompanııa karantınge jabyldy.