Qazaqstan Respýblıkasynyń Táýelsizdik kúnine oraı Túrkistandaǵy Qoja Ahmet Iаsaýı kesenesinde mýzeılendirilgen kitaphana bólmesi ashylyp, kórme ekspozısııasyna 591 dana sırek kitaptar men mýzeı qorynan alynǵan 20-dan astam etnografııalyq jádigerler qoıyldy.
Tarıhı derekterge súıensek, Qoja Ahmet Iаsaýı kesenesindegi kitaphana bólmesi 1950 jyldarǵa deıin jumys istegen eken. Onda eski kitaptar men dinı eńbekter ıin tiresip turatyn deıdi eski kózder.
Al qazirgi tańda qoryq-mýzeıi qorynda 3 000-ǵa jýyq jazba eskertkish saqtalsa, onyń ishinde: 440 dana kóne kitap, 160 dana túpnusqa qoljazba, 21 dana tarıhı qujat, t.b. bar kórinedi.
Osylardyń ishinen, joǵarydaǵy mýzeılendirilgen kitaphana bólmesine: «Dıýanı hıkmet» iliminiń túpnusqa qoljazbasy jáne 1887-1901 jyldary Qazanda, 1901 jyly Ystambulda, 1902-1911 jyldary Tashkentte jaryq kórgen nusqalarymen qatar, «Rısalla dar adabı tarıqat», «Paqyrnama», «Mıratýl qýlýb» sekildi óte sırek kezdesetin qoljazbalar, Qoja Ahmet Iаsaýıdiń ataqty shákirtteri S.Baqyrǵanıdiń «Dıýan» qoljazba eńbegi, Sheıh Hýdaıdad Tash-Mýhammed ál-Býharıdiń «Býstan ýl Mýhıbbın» atty túrki tilinde jazylǵan eńbegi, Á.Naýaıdiń «Ǵazaldary», Fızýlıdiń shyǵarmalary, Farıd ad-dın Muhammad ıbn Ibrahım Attardyń «Tazkırat ýl-Aýlııa», Sofy Allaıardyń «Mýslık al-Mýttakın», Áýlıe Bıdeldiń «Dıýan» qatarly qundy dúnıeleri qoıylǵan eken. Bul kitaptardan basqa qundy tápsirler, Muhtasar, Qurandar, «Ǵaıas al-lýǵat Mýntahab al-lýǵat» atty til bilimi týraly eńbek, «Rısaqatýn ýafııatýn fı ıslamı abnı aǵı» deıtin arab tili grammatıkasy, «SharhýlÝıqaıatı, Ýmýratý rııatı» atty sharıǵı taldaý jáne kesenede jerlengen tulǵalarǵa qatysty serııaly baspa ónimderi de sóreden oryn alypty. Sondaı-aq ózbekstandyq ǵulama ǵalym Shaıyq Muhammad Sadyq Muhammmad Iýsýftyń jeke kitaphanasynan mýzeı qoryna syıǵa berilgen 85 dana qundy týyndylar da kópshilik nazaryna usynyldy.