«Kelimsek» is-sharasy barysynda Almatyda 11 jyl boıy zańsyz turǵan Aýǵanstan azamaty anyqtaldy, dep habarlaıdy Egemen.kz Polisia.kz saıtyna silteme jasap.
Belgili bolǵandaı, 30 jastaǵy sheteldik osy ýaqytqa deıin muqııat jasyrynyp júrgen, ol jalǵyz ómir súrip, eshkimmen baılanys jasamaǵan, esh jerde jumys istemegen. Ol QR ÁQBtK-niń 517-baby (Sheteldiktiń nemese azamattyǵy joq adamnyń Qazaqstan Respýblıkasynyń halyqtyń kóshi-qony salasyndaǵy zańnamasyn buzýy) boıynsha jaýapqa tartyldy. Zańnamany óreskel buzýshy Almatyda 14 qańtarda bastalǵan “Kelimsek” aldyn-alý is-sharasy kezinde anyqtaldy.
Is-shara Qazaqstan Respýblıkasynyń kóshi-qon zańnamasyn buzýdy anyqtaýǵa baǵyttalǵan. Reıdter kezinde sheteldikterdiń bolý obektileri, sondaı-aq olardyń ýaqytsha turý oryndary tekseriletinin atap ótken jón. 4 kún ishinde kóshi-qon jáne jergilikti polısııa qyzmetiniń qyzmetkerleri basqa elderdiń 629 azamatyn tekserdi. Nátıjesinde Qazaqstan Respýblıkasynda bolý erejelerin buzǵany úshin 25 sheteldik ákimshilik jaýapkershilikke tartyldy. Jeke tulǵasyn anyqtaý maqsatynda PD-niń qabyldap-taratýyna 35 sheteldik ornalastyryldy. Sonymen qatar, bizdiń otandastarymyzdyń ishinen olardy qabyldaýshy 34 adam ákimshilik jaýapkershilikke tartyldy, – dedi Almaty qalalyq Polısııa departamenti Kóshi-qon qyzmeti basqarmasynyń bastyǵy Ashat Býtýnchınov.
Polısııa málimetteri boıynsha, jedel-aldyn alý is-sharasy barysynda jeke tulǵasyn rastaıtyn qujattary joq Reseı Federasııasynyń 1978 jyly týǵan azamaty anyqtaldy jáne PD-niń qabyldap-taratýyna ornatyldy.
– Tekserý is-sharalarynyń nátıjesinde onyń Qazaqstan Respýblıkasynyń aýmaǵyna 2010 jyly kelgeni jáne óziniń zańdy mártebesin áli rettemegeni anyqtaldy. Sonymen qatar, osy kúnderi Qazaqstan Respýblıkasynyń aýmaǵynda eki jyldan jáne bes jyldan beri qujatsyz júrgen О́zbekstan Respýblıkasynyń eki azamaty anyqtaldy. Bul faktiler boıynsha qoldanystaǵy zańnamaǵa sáıkes sharalar qabyldanýda, – dedi Ashat Býtýnchınov.