Almaty qalasyndaǵy Abaı atyndaǵy Qazaq memlekettik akademııalyq teatry basshysy Aıa Qalıeva qyzmetinen bosatyldy. Teatr ujymy onyń qyzmetten eshqandaı eskertýsiz jáne sebepsiz bosatylǵanyna narazylyqtaryn bildirdi, dep habarlaıdy Egemen.kz
«Buıryq mınıstrdiń ózinen emes, jeke poshta mekenjaıyna hat túrinde keldi. Men alǵys sózin aıtyp turǵam joq, jeke adamdy qurmettegendikten ǵana. (...) Men mundaı jaǵdaıdy kez kelgen adamǵa qatysty ádiletsizdik dep sanaımyn. Búgin Eńbek kodeksin buzý týraly buıryq alǵan kezde, bul týraly ashyq aıtamyn dep sheshtim. Meniń kelisim shartym uzartylǵan, 2020 jyly ol sheksiz merzimge sozylǵan bolatyn», dedi teatr dırektory Aıa Qalıeva.
Alaıda teatr ujymy bul sheshimmen kelispeı otyr. Qyzmetkerler Aıa Qalıevany jaqsy basshylardyń biri dep sanaıdy. Sebebi onyń teatr dırektory retinde jumys istegen kezeńinde teatr mańyzdy ári birtalaı belesti baǵyndyrǵanyn basa aıtty. Búgin teatr qyzmetkerleri basty sahnaǵa jınalyp, basshylaryna qoldaý bildirip, onyń jumystan shyǵarylýyna narazylyq bildirdi.
«Men teatrda 10 jyldan asa ýaqyt jumys istedim. Teatrdyń biraz dırektorymen qyzmet atqardyq. Bizdiń basty mindetimiz - teatr deńgeıin kóterý, kórermenderdi qýantý, memleketimizde óner deńgeıin kóterý. Basshylyqty osylaı ózgertken jaǵdaı bolmaǵan. Bul kútpegen jaǵdaı boldy. Teatrda jumys istegen ýaqyt ishinde shyǵarmashylyq ujym basshylary osyndaı uıymshyl bolǵan emes. Teatrdy alǵa jyljytý ıdeıasyn bárimizge úlgi etti. Munyń bári Aıa Jákenqyzynyń eńbegi», dedi balet trýppasynyń jetekshisi Gúljan Tutqybaeva.