Elimizdiń jetekshi agrarlyq zertteý joǵary oqý oryndary qoldaýdy qajet etedi. Bul týraly senator Sultan Dúısembınov elimizdiń Premer-Mınıstriniń atyna depýtattyq saýalynda aıtty, dep habarlaıdy Egemen.kz.
Depýtattyń pikirinshe, QazUAZÝ-da joǵary tehnologııalyq aýyl sharýashylyǵy kásiporyndary úshin kadr tapshylyǵy máselesin sheshýge 100 orynǵa arnalǵan memlekettik maqsatty bilim berý tapsyrysyn berý kómektesedi. Al S.Seıfýllın atyndaǵy QazATÝ-da jáne onyń 3 enshiles ǵylymı-zertteý ınstıtýttarynda senator ınfraqurylymdy jańǵyrtýdy surap otyr. О́ıtkeni, qazirgi ýaqytta olar eskirgen jáne moraldyq turǵydan eskirgen.
Sonymen qatar, senator Esik memlekettik dendrologııalyq saıabaǵyn Ekologııa mınıstrligi qaramaǵynan alyp, ǵylymǵa qaıtarýdy usyndy.
«Esik memlekettik dendrologııalyq saıabaǵy 1959 jyly ýnıversıtettiń kórnekti ǵalymdarynyń qatysýymen, jemis jáne sándik aǵashtar men butalar assortımentin keńeıtý, raýshandar kolleksııasyn tolyqtyrý maqsatynda qurylǵan. Biraq, saıabaq 2019 jyly Qazaqstan Respýblıkasynyń Ekologııa, geologııa jáne tabıǵı resýrstar mınıstrligine berilip, saıabaqta joǵaryda atalǵan jumystar tolyqtaı toqtatylǵan, óıtkeni dendrosaıabaqtyń jer ýchaskeleri erekshe qorǵalatyn tabıǵı aýmaqtar sanatyna jatqyzylǵan. Sondyqtan, osy salada ǵylymı - tájirıbelik qyzmetti keshendi túrde júzege asyrý úshin ýnıversıtetke saıabaqty berý jáne oǵan erekshe qorǵalatyn aımaq mártebesin zańdy tulǵa qurýsyz qarastyrý usynylady», - dedi senator Sultan Dúısembınov.