Stýdent-jastardyń arasyndaǵy sporttyq oıyndarda bolatyn úlken jarystardy «Ýnıversıada» degen sııaqty mektep oqýshylary arasynda bolatyn sondaı saıysty «Gımnazıada» dep ataıtyny belgili. Halyqaralyq mektepter federasııasynyń uıymdastyrýymen bolatyn bul jarystar alǵash ret 1974 jyly Germanııanyń Vısbaden qalasynda bolǵan. Alaıda KSRO oqýshylary oǵan qatyspaı, ózderinde osyǵan uqsaıtyn Spartakıada degen sporttyq jarystar uıymdastyratyn.
Al táýelsiz Qazaqstan halyqaralyq tájirıbeni moıyndap, Gımnazıada bizde bıyl 10-shy ret bolyp otyr. Prezıdent Q.Toqaev Qazaqstan halqyna arnaǵan sońǵy Joldaýynda óskeleń urpaqtyń kúsh-qýatyn durys arnaǵa baǵyttap, buqaralyq sportqa baýlý týraly tapsyrma bergen edi. Mektep oqýshylary arasynda 8 sport túrin qamtyǵan osy Gımnazıada Joldaýdyń tapsyrmasyn oryndaýǵa baǵyttalǵan.
Bıyl qazaqstandyq oqýshylar alǵash ret Qytaıdyń Sınszıan qalasynda ótetin Búkilálemdik jazǵy gımnazıadada óner kórsetedi dep josparlanýda. Bilim jáne ǵylym mınıstrligine qarasty Ulttyq ǵylymı-praktıkalyq dene tárbıesi ortalyǵy el Táýelsizdiginiń 30 jyldyq mereıtoıyna arnalǵan H qysqy Qazaqstan oqýshylar gımnazıadasyn elimizdiń bas qalasy men Qyzyljar óńirinde ótkizilip jatyr. Keshe Gımnazıadanyń Qyzyljardaǵy bóliginiń saltanatty ashylý rásimi bolyp, onda Premer-mınıstrdiń orynbasary Eraly Toǵjanov pen Bilim jáne ǵylym mınıstri Ashat Aımaǵambetovtiń arnaıy quttyqtaýlary oqyldy. Al «Ulttyq ǵylymı-praktıkalyq dene tárbıesi ortalyǵynyń» bas dırektory Tastanbek Esentaev, Soltústik Qazaqstan oblysy ákiminiń orynbasary Ǵanı Nyǵmetov, sport ardageri, KSRO qurmetti sport sheberi, QR sport qaıratkeri Jambyl Tasemenov, sporttyq baǵdarlaý boıynsha Azııa oıyndarynyń chempıony Aslan Toqbaev jas sportshylarǵa izgi tilekterin aıtty.
Búgingi tańda elordada konkımen syrǵanaý sporty men mánerlep syrǵanaý jarystary óz máresine jetip, oza shaýyp báıge alǵan úzdikterdiń esimi anyqtaldy. Jalpy Gımnazıada bıatlon, shaıbaly hokkeı, qysqy prezıdenttik kópsaıys, qysqy sporttyq baǵdarlaý, shańǵy jarysy, short-trek, konkımen jarys jáne mánerlep syrǵanaý sııaqty 8 sport túrinen ótýde.
Konkımen syrǵanaý sportynan 8 aımaqtyń ishinen komandalyq esepte uldar arasynda Almaty qalasy, qyzdar arasynda Soltústik Qazaqstan oblysynyń oqýshylary kósh bastady. Sportqa daryndy balalardy Olımpıada chempıondary Baqtııar Artaev pen Sárik Sápıevtiń qoldap kelgeni oqýshylar úshin tosynsyı boldy.
Aıaqtalǵan mánerlep syrǵanaý jarysynyń jeńimpazdaryn BǴM «Mektepke deıingi jáne orta bilim berý komıtetiniń» bólim basshysy Gúlmıra Kulsarıeva, Olımpıada oıyndarynyń qola júldegeri Arman Shylmanov, Konkımen júgirý sporty ulttyq federasııasynyń bas hatshysy Anjelına Makısheva, Álem chempıonatynyń kúmis júldegeri Elızabet Tursynbaevanyń jattyqtyrýshysy Baıtaq Tursynbaev, Nur-Sultan qalasy Investısııalar jáne kásipkerlerdi damytý basqarmasy basshysynyń orynbasary Qanat Isabekovter marapattady.
Mánerlep syrǵanaýdan komandalyq esepte 237,6 upaımen altyn medaldi Almaty qalasy ıelense, 2-oryndy 233,2 upaımen Nur-Sultan qalasy, 3-oryndy 162,6 upaımen Qaraǵandy oblysy aldy. Bul sport túrinen jarysqa elimizdiń alty óńirinen 65 sportshy jetkinshekter qatysqan edi. Aıta ketý kerek, demeýshilerdiń qoldaýynyń arqasynda — Astana Garden School, №54 mektep-lıseı jáne t.b. mektep ujymdarynyń ata-analary men ustazdary jarysty jáne marapattaý rásimin Ortalyqtyń ıýtýb kanalynan tikeleı efırde tamashalady.
Mánerlep syrǵanaýdan keıin shaıbaly hokkeı men bıatlon, qysqy prezıdentti kópsaıys básekesi bastaldy. Olardyń ashylýy Petropavl qalasyndaǵy A.Vınokýrov atyndaǵy sport saraıynda boldy.
Jarystyń alǵashqy kúni Aqmola oblysynyń balalary Shyǵysqazaqstandyqtardy 8:2, Almaty oblysy da qostanaılyqtardy osyndaı eseppen jeńdi. Bul sport túrine 9 óńirden 180 oqýshy qatysýda. Jarystar 5 naýryzǵa deıin jalǵasady.
Qysqy prezıdenttik kópsaıysqa Almaty qalasy jáne Aqmola, Almaty, Shyǵys Qazaqstan, Qaraǵandy, Qostanaı, Pavlodar, Batys jáne Soltústik Qazaqstan oblystarynan 100-den asa oqýshy qatysýda.