«Astana-Opera» teatrynyń burynǵy jetekshi solısi, sońǵy jarty jyl boıy Elýbaı О́mirzaqov atyndaǵy Qostanaı oblystyq fılarmonııasyn basqarǵan Súndet Baıǵojın óz erkimen qyzmetinen ketti, dep habarlaıdy Egemen.kz
Eýropanyń úlken sahnalarynda óner kórsetip, esimi álemge tanylǵan belgili opera ánshisine bir oblystyń fılarmonııasy tarlaý bolǵan shyǵar dep oıladyq.
Alaıda 12 naýryz kúni baspasóz jıynyn ótkizip, jýrnalıstermen kezdesken Qostanaı fılarmonııasynyń ujymy basshymyz aramyzdaǵy 2-3 aryzqoı adamnyń kesirinen joǵary jaqtyń qysymymen ketti dep málimdedi. Baspasóz jıynynan keıin fılarmonııa ǵımaratynyń aldyna shyǵyp narazylyq aksııasyn ótkizgen fılarmonııa ártisteri «Basshymyzdy qaıtaryńyzdar!» degen úndeý jarııalady.
– Biz bul sheshimge qarsymyz. О́ıtkeni Súndet Baıǵojın bizge kelgeli beri óziniń bilimdi de bilikti, ádil basshy, sheber uıymdastyrýshy ekenin kórsete bildi. Fılarmonııanyń mártebesi kóterildi, elimizdegi iri óner ordalarymen qanshama memorandýmdarǵa qol qoıylyp, karantınnen shyqsaq, úlken jobalardy qolǵa alamyz dep josparlap otyrǵan edik. 9-naýryz kúni aıaq astynan ujymdy jınap, men jumystan ketý týraly ótinishke qol qoıdym dedi. Muny basshymyzdyń emes, joǵary jaqtyń sheshimi dep bilemiz. О́ziniń týǵan jerine qyzmet etemin dep kelip otyrǵan álemdik deńgeıdegi óner adamyn keýdesinen ıterip, bar, ket degizip qoıa almaımyz, − dedi fılarmonııa ánshisi Maıra Qarjaýova.
Súndet Baıǵojın oblystyq fılarmonııaǵa byltyr qyrkúıek aıynda basshy bolyp taǵaıyndalǵan edi. Baspasóz jıynyn uıymdastyrýshylardyń aıtýynsha, sodan beri ujymnyń ishindegi 2-3 adam jańa basshynyń ústinen joǵarydaǵylarǵa «basshymyz ultshyl, bizdi qýdalap jatyr» dep qaıta-qaıta aryz jaza bergen.
«Biz dırektordyń ultshyldyǵyn kórgen joqpyz. Orysshaǵa da, qazaqshaǵa da jetik. Ár adamnyń kóńilin taba biledi. Biraq ol kisi kelgeli jumysqa degen talap kúsheıgeni ras», deıdi burynǵy basshynyń áriptesteri.
− Fılarmonııa ujymynyń 90 paıyzy Súndet Baıǵojınnyń basshylyǵymen jumys istegisi keledi. Biraq ortamyzda basshymyzdyń jumys isteý ádisin unatpaıtyn biren-saran adamdar bar. Olar dırektordyń kásibı deńgeıde jumys isteýdi talap etkenin orynsyz tıisý, qýdalaý dep túsindiredi. Nátıjesinde, fılarmonııany alǵa jeteleıtin naǵyz kerek basshydan aıyrylyp qalyp otyrmyz. Sondyqtan oblys ákiminiń orynbasarynan bizben kezdesip, jan aıqaıymyzdy aımaq basshysyna jetkizýin talap etemiz. Súndet osy oblystyń ǵana emes, búkil elimizdiń abyroıyn asqaqtatyp júrgen birtýar ónerpaz. Mundaı adamdy jumystan bosatyp, jaı jibere salýǵa bolmaıdy. Eger jumys barysynda qate jiberse, birden qyzmetinen bosatpaı, eskertý jasaý kerek edi. Qazir karantın talaptary jeńildep, endi jumysqa kirisemiz dep otyrǵanda basshysyz qalyp, ne isterimizdi bilmeı otyrmyz, − dedi fılarmonııa ánshisi Arystan Qurmanov.
О́nerpazdardyń pikirinshe, Súndet Baıǵojınnyń qyzmetinen ketýine onyń ornyna qyzyǵyp júrgen baqtalas áriptesteriniń yqpaly tııýi múmkin.
− Burynǵy basshymyz marqum Nazymbek Moldahmetov mezgilsiz qaıtys bolǵan soń, bizdiń ishimizde dırektorlyqqa úlken talas bastaldy. Bizdi jasandy túrde jik-jikke bólip, «sen anaǵan daýys beresiń, ol mynaǵan daýys beredi» degenge deıin bardy. Bılikke qyzyqqandardyń ishinde eń aldymen qazirgi orynbasar Zýhra Imanova bar. Odan keıin eski dırektor Aleksandr Evsıýkov, rejısser Elena Krıvovalar tur. Túzý basshynyń syrtynan jan-jaqqa domalaq aryz domalatqandar da osylar bolýy múmkin, − dedi fılarmonııa ánshisi Serik Ábilev.
Alaıda fılarmonııa dırektorynyń orynbasary Zýhra Imanova áriptesteriniń sózin teriske shyǵaryp, Súndet Baıǵojınniń ózine eshqandaı qysym kórsetpegenin, onyń laýazymynan ketkeni ózi úshin tosyn jaǵdaı ekenin alǵa tartyp, at-tonyn ala qashty.
Súndet Baıǵojınge qońyraý shalyp edik, burynǵy basshy: «Men jumys barysynda ózime deıin jasalǵan kóptegen zańǵa qaıshy dúnıelerdi taptym. Fılarmonııa dırektorynyń orynbasary Zýhra Imanova laýazymyn asyra paıdalanyp, mór basýǵa quqy bolmasa da, jumys oryndaryn zańsyz úlestirgen. Bul vakansııalardyń buıryǵy 21-i kúni shyqsa, jumysqa ornalasýshynyń ótinishi 22-si kúni berilgen. Buıryq ótinishtiń negizinde shyqpaı ma? Munda kerisinshe, birinshi buıryq shyǵady da, odan keıin ótinish jazylady. Osylaısha orynbasar qol qoıý, mór basý quqy bolmasa da bos oryndardy ońdy-soldy úlestirgen. Ol adamdar orynbasarǵa aqsha tólegen. Fılarmonııaǵa tirkelgen bir-eki adam karantın bastalǵaly Reseıde júr, eshqashan jumysqa shyqpaǵan. Olarǵa munda aılyq tólep, artyn jasyryp-jaýyp otyrǵan. Munyń bári dırektordyń mindetin atqarýshy issaparda júrgende jasalyp otyr. Men bul zańsyz jumys oryndaryn jaýyp tastadym. Orynbasarym Zýhra Imanova meni jan-jaqqa jamanatty ǵyp, basynan aıaǵyna deıin jumys istetkizbedi. Ol kisiniń bizge bilimi de sáıkes kelmeıdi, mýzykant emes, sóıte tura shyǵarmashylyq ujymda dırektordyń orynbasary bolyp otyr. Bulaı bolmaıdy. Qazir ujym qalap jatsa, men qyzmetime qaıtyp kelýge daıynmyn. Biraq maǵan biraz dúnıeni retteý kerek. Orynbasar jumystan ketýi kerek. Osynyń bárin uıymdastyryp otyrǵan - Aleksandr Evsıýkov. Al Krıvova «Bizdiń bıshilerimiz Reseıde júr» dep men jumysqa kelgen kúni-aq aıtýy kerek edi. Ony men qujattardy teksergenshe, jasyryp, aılyq tólep kelgen. Osynyń bári óreskel zań buzýshylyq bolyp tabylady. Men Krıvovaǵa qatań sógis daıyndap qoıǵam. Bul úsheýine óner ordasynda oryn joq. Bulaı bolmaıdy. Ishten irip jatqan jerde qalaı ónermen aınalysýǵa bolady? Eger bári durystalsa, fılarmonııaǵa mindetti túrde kelem. Men sol úshin jarty jyldyń ishinde qanshama opera teatrymen kelisim-shartqa otyryp, búkil adamdardy oryn-ornyna qoıyp, vakansııalardy durystap, kórkemdik jetekshilerdi shaqyrtyp, jarty aılyqpen júrgenderdi tolyq jalaqyǵa kóshirip, bári durystaldy, endi karantın jeńildese, jumysqa kirisemiz dep otyrǵanda mynadaı jaǵdaı bolyp otyr. О́te ókinishti», dedi.
Mádenıet basqarmasynyń basshysy Erlan Qalmaqovtyń aıtýynsha, Súndet Baıǵojın fılarmonııa dırektory qyzmetinen óz erkimen ketken.
− Súndet Ábdirahmanuly – esimi Qazaqstanǵa ǵana emes, álemniń kóptegen eline tanylǵan asa talantty, óte bedeldi úlken sahnanyń adamy. Biz byltyr fılarmonııa dırektory laýazymyna taǵaıyndaǵanda ol kisige bar kúsh-jigerin salyp eńbek etip, úlken shyǵarmashylyq ujymdy jańa belesterge jeteleıdi degen senim artqan edik. Alaıda jarty jyldan keıin jumystan ketý týraly óz qolymen jazylǵan ótinishin ákelip, óz erkimen qyzmetinen ketti. Eń áýeli Súndet Ábdirahmanuly shyǵarmashylyqtyń adamy ekenin túsinýimiz kerek. Bilýimshe, qazirdiń ózinde elordamyzda televızııalyq jobaǵa qatysyp jatyr. Karantın aıaqtalsa, ol kisige túrli shyǵarmashylyq jobalarǵa shaqyrtýlar kóbeıedi. Iаǵnı únemi saparǵa shyǵýyna týra keledi. Sondyqtan Súndet Ábdirahmanulynyń taza shyǵarmashylyqpen aınalysý týraly qabyldaǵan sheshimin durys dep qabyldap, ótinishine qol qoıdym. Adamnyń óz erkimen qabyldaǵan erikti sheshiminen qandaı da bir zańsyzdyqty izdeý durys emes. Al esimi álemge tanymal adamǵa qysym kórsetti deý, árıne, artyq sóz. Tipti qazir fılarmonııada eńbek etip júrgen adamdarǵa da basshy retinde qysym kórsetý múmkin emes. О́zderińiz kórip otyrsyzdar ǵoı, qaı-qaısy da osy óńirge belgili, bedeldi adamdar, ujym bolyp óz oı-pikirlerin erkin bildirip jatyr. Biraq bul jerde búkil ujym degen sóz orynsyz shyǵar. Úlken óner ujymyndaǵy shaǵyn ǵana bir top óz oıyn bildirip jatyr. Oblystyq fılarmonııada búginde 300-ge jýyq adam jumys istese, sonyń ishinde 40 shaqty adam basshylarynyń ketýine qarsy. Ol kisilerdiń pikirin qurmetteımiz, biraq jumystan ketý týraly bastama dırektordyń ózinen shyǵyp otyr, − dedi E.Qalmaqov.
Fılarmonııa ujymy kelesi aptada oblys ákimine shyǵyp, Súndet Baıǵojındi ózderine qaıta basshy etip taǵaıyndaýdy ótinbek. Bul máseleniń sheshim tabý, tappaýy aldaǵy ýaqyttyń enshisinde.
Qostanaı oblysy