Ol ras. 1981 jyly naýryz aıynyń 22-si kúni mońǵol azamaty Jýgderdemıdıın Gýrragcha men KSRO-nyń eki dúrkin Batyry, ushqysh-ǵaryshker Vladımır Janybekov «Soıýz-39» kemesimen Baıqońyrdan ǵaryshqa kóterilgen bolatyn. Atalǵan oqıǵaǵa 40 jyl tolyp otyr.
Ulystyń uly kúni – mońǵol ǵaryshkeri úshin umytylmas data. Jyl saıyn Naýryz merekesimen ǵaryshker J.Gýrragcha ǵalamnyń bar qazaǵyn quttyqtaıdy. О́ziniń kókke kóterilgen núktesi qazaq dalasy ekenin, ári qaıta oralǵanda taǵy da qazaq dalasyna aman-esen tabany tıgenin maqtanyshpen eske alady.
– Onyń syrtynda, – deıdi mońǵol ǵaryshkeri, – ótken ǵasyrdyń jetpisinshi jyldarynyń basynda ásker qataryna shaqyrylyp, radıo-lokator polkine kelgenimde, meni qabyldaǵan rota komandırim Qusan Rústem degen qazaq azamaty edi. Osy kisi keıin meniń áskerı ushqyshtardy daıarlaıtyn Frýnze atyndaǵy ýchılıshege oqýǵa barýyma qoldaý kórsetti. Eger Qusan kókem bolmasa, ǵaryshker bolmaýym da múmkin ekenin eske alamyn.
Mońǵol ǵaryshkeriniń ustazy atanǵan qazaq Qusan Rústemuly 2005 jyly atajurtyna oralyp, Qaraǵandy oblysy, Buhar jyraý aýdany, Baımyrza aýylynda dúnıeden ótti.
– Bulardan basqa meni qazaq halqymen rýhanı baılanystyratyn taǵy eki tulǵa bar, – deıdi J.Gúrragcha. – Onyń birinshisi, úzeńgiles dosym ataqty ǵaryshker V.Janybekov 1942 jyly Ońtústik Qazaqstan oblysynyń Eskendir (Iskander) aýylynda dúnıege kelgen bolsa (bul eldi meken 1956 jyly О́zbekstan quramyna berilgen), ekinshisi – eń jaqyn dosym qazaq halqynyń úlken aqyny Muhtar Shahanov.
Qos ǵaryshker ǵaryshtan aman-esen oralǵan soń, qoıyn qurttap, aıranyn urttap jaımashýaq otyratyn mońǵol jurty úlken toı jasady. Eki azamatty qosarly attaı alyp júrip, barlyq aımaqty aralatty. Osy sapardy eń áýeli Mońǵolııa Úkimeti Baı-О́lke aımaǵynan bastady. Aımaq jurty qos ǵaryshkerdi taıly-tuıaǵymen qarsy aldy. Qazaq pen ózbek arasynda ósken V.Janybekov jergilikti jurtpen qadaý-qadaý bolsa da qazaqsha til qatysqany áli kúni el esinde.
Mońǵol ǵaryshkeri bıyl da jyldaǵy ádeti boıynsha qazaq halqyn Ulystyń uly kúnimen quttyqtaıdy.