SQO Qyzyljar aýdany Sokolovka aýylyndaǵy poselkelik polısııa bólimshesinde keshki mezgilde óz jumystarymen otyrǵan polıseıler kórshi úılerdiń biriniń shatyrynan laýlaǵan jalyndy kórip qalady. Dereý órt sóndirý qyzmetine qońyraý shalýmen qatar oqıǵa ornyna úsh ofıser júgirip jetedi. PPB bastyǵy, polısııa maıory Eldar Allahveranov úıdiń terezesin tarsyldatqan. Alaıda úıdiń janyp jatqanyn telefonmen qyzý sóılesip jatqan eki kempir sezbegen. Olar tipti terezeniń tarsylyna da mán bermegen.
Osy ýaqytta ýchaskelik ınspektorlar Azamat Qabdyrashıtov pen Nazar Meńdekeev qorshaýdan sekirip túsip, maldy shyǵarý qajet bolar degen oımen qora-qopsyny teksergen. Eń bastysy, janyp jatqan saraıdan olar ot sharpýǵa jaqyn qalǵan 50 lıtrlik gaz ballondy qoldasyp kóterip, aýlaqqa, qaqpanyń syrtyna alyp shyqqan. Eger osy ballon jarylǵanda bul úı ǵana emes japsarlata salynǵan kórshi úılerdiń aman qalýy ekitalaı edi...
Odan ári kórshilermen birge tártip saqshylary órtti sóndirýge tyrysqan. Alty mınýttan keıin órt sóndirý qyzmeti de jetedi. 14 sharshy metr jerdi jaılaǵan órt ýaqytynda sóndiriledi. О́rt sóndirýshilerdiń kásibı sheberliginiń arqasynda qalǵan ǵımarattar búlingen joq. «Poselkelik polısııa bólimshesiniń qyzmetkerleri qıyn jaǵdaıda saýatty is-áreket jasap, qyraǵylyq tanytty. Gaz balon jarylǵan jaǵdaıda saldary aýyr bolar edi. Polısııa qyzmetkerleri halyqqa qyzmet etý isindegi ózderiniń adaldyqtaryn kórsetti», - deıdi Qyzyljar aýdany polısııa bólimi bastyǵynyń mindetin atqarýshy, polısııa polkovnıgi Petr Klımov.