Memleket basshysy Qasym-Jomart Toqaev asa kórnekti jazýshy, Memlekettik syılyqtyń ıegeri, belgili qoǵam qaıratkeri Qabdesh Jumadilovtiń dúnıeden ótýine baılanysty kóńil aıtyp, jedelhat joldady, dep habarlaıdy Egemen.kz Aqordanyń baspasóz qyzmetine silteme jasap.
«Qabdesh Jumadilulynyń qalamynan shyqqan týyndylar dáýirdiń júgin, zamana kelbetin, qoǵamnyń únin aıqyn kórsete bilgen edi. Sonyń ishinde qıly kezeńdi bastan keshken halyqtyń taǵdyryn arqaý etken romandary memleket jáne qalyń kópshilik tarapynan joǵary baǵasyn aldy. Qarymdy qalamger elimizdiń rýhanı salasyn damytýǵa mol eńbek sińirdi. О́negeli ǵumyr keship, sońyna óshpes iz, sarqylmas mura qaldyrǵan Qabdesh Jumadilulynyń esimi men jarqyn beınesi halqymyzdyń júreginde máńgi saqtalady», delingen jedelhatta.