Shyǵys Qazaqstannyń dárigerleri yntalandyrý ústemeaqysyn tolyq ala almaı júrgen soń zańgerdiń kómegine júgingen. Jedel járdem qyzmetkerleriniń quqyǵyn qorǵaýmen aınalysatyn advokattyń aıtýynsha, ústemeaqy somasy 70 mlrd teńgege jetken.
Alaıda oblystyq densaýlyq saqtaý basqarmasynyń basshysy Ermek Omarbekov memlekettiń eshkimge bereshegi joq ekenin aıtyp aqtaldy. Biraq aty jaman indet elimizge engeli jedel járdem stansasynyń qyzmetkerlerinen maza ketken. Kún-tún demeı, aldyńǵy shepte aýrýmen betpe-bet keletin de solar edi.
– Bizge aı saıyn 425 myń teńge tóleý kerek bolǵan. О́kinishke qaraı, ondaı qarajat alyp otyrǵanymyz joq. 10-20 paıyzyn ǵana tóledi. Byltyr jaz aılarynda tynym tappaı eńbek etsek te ústemeaqydan qaǵylyp qaldyq, – deıdi jedel járdem qyzmetkeri Darhan Esjanov.
Tıisti degen ústemeaqylaryn ala almaı júrgen dárigerler oblystyń aýdandarynda da az emes. Qaıda baryp, shaǵym aıtaryn bilmeı júrgender de jetkilikti. Jalpy alǵanda, ádildik izdegen 300-den astam aq halatty advokattyń kómegine júgingen. Onyń ishinde Semeı men Rıdder qalalarynyń da dárigerleri bar. Advokat Elena Sýhovanyń aıtýynsha, dárigerlerge degen bereshek óte aýqymdy.
– Ústemeaqynyń mólsherin shamalap eseptegenniń ózinde 70 mlrd teńgege shyǵyp tur. Onyń ózinde, biz tek Shyǵys Qazaqstandaǵy jedel járdem stansasynyń qyzmetkerlerine degen qaryzdy esepteı aldyq, – deıdi Elena Sýhova.
Al densaýlyq saqtaý basqarmasynyń basshysy medısına qyzmetkerleri men advokattyń aıtqan ýájderin joqqa shyǵaryp otyr. Iаǵnı eshqandaı qaryzdyń joqtyǵyn aıtady.
– Men О́skemendegi jedel járdem stansasynyń qyzmetkerleri tıisti járdemaqy men tólemderin ala almady degen aqparatty joqqa shyǵarǵym keledi. Áleýmettik medısınalyq saqtandyrý qory medısınalyq qyzmetkerlerge tıesili barlyq qyzmeti ótemaqy tólemderin tóledi. 2020 jyl men 2021 jyldyń qańtar-aqpan aılary da tolyǵymen jabyldy. Búkil Qazaqstannyń dárigerlerine bir Jarlyq boıynsha tólenedi. Zań bárine birdeı. Úkimettiń qaýlysy, Densaýlyq saqtaý mınıstriniń buıryǵy bar. Barlyq tólemdi ashyq túrde kóre alasyzdar. Qaryz joq, – deıdi nyq senimmen oblystyq densaýlyq saqtaý basqarmasynyń basshysy Ermek Omarbekov.
Áleýmettik medısınalyq saqtandyrý qorynyń Shyǵys Qazaqstan oblysy boıynsha fılıalynyń dırektory Ǵalymjan Ábilov óńir dárigerlerimen birneshe ret kezdesý ótkizip, tıesili járdemaqyny esepteý boıynsha túsiniktemeler berilgenin aıtady. Tek 2020 jyly medısınalyq qyzmetkerlerge berilgen tólemder somasy 8 mlrd teńgeni quraǵan.
– 2021 jyldyń qańtar-aqpan aılary boıynsha jedel járdem qyzmetkerlerine barlyq tólem berildi. Bizge uıymnan áli naýryz aıyna ótinishter túsken joq. Baqylaý júrgizilip, bári eseptelip jatyr. Tólemder boıynsha komıssııaǵa ótinish túsken soń qarajat operatory hattamaǵa sáıkes tıisti tólemderdi júzege asyrady. Ár aıdyń onyna deıin tólem jasaımyz. Tólemderdi keshiktirgen emespiz. Dál qazir eshqandaı qaryz joq, – dedi Ǵ.Ábilov.
Aıta keteıik, aldaǵy ýaqytta Áleýmettik saqtandyrý qory fılıalynyń mamandary medısına qyzmetkerlerine 2020 jyldyń jáne 2021 jyldyń birinshi toqsanynda qansha qyzmetkerge, qansha jedel járdem brıgadasyna aýdarǵan qarajaty týraly búge-shigesine deıin barlyq esepti usynatyn bolady.
Shyǵys Qazaqstan oblysy