Qazir mektep bitirý arzan bolmaı tur. Bitirýshi túlektiń kıer kıiminen bastap, baratyn meıramhanasyna deıin qymbat. Saltanatty keshtiń asta tók dastarqanyna jaıǵasý úshin ár adam 45-60 myń teńge aralyǵynda tóleýi qajet. Sonda bir otbasy meıramhananyń ózine 135-180 myń teńge shyǵarýy kerek. Balasyn qatardan qaldyrǵysy kelmegender qolyndaǵy baryn berip, jetpegenin nesıemen jamap jatyr. Jalpy bıyl mektep bitirýshiler qansha qarjy jumsap jatqandyǵy jóninde Egemen.kz tilshisi anyqtap kórdi.
Sáýir aıynda Oqý-aǵartý mınıstrligi bilim alýshylar men ata-analarǵa qarajat jınaýǵa qatań tyıym salǵan bolatyn. Alaıda vedomstvonyń bul úndeýine qulaq asar jan joq. Sebebi kóp mektepte qarjy jınaý jumystary byltyr, ıaǵnı jeltoqsan aıynda bastalyp ketken.
«Ulym 11-synypty bitirip jatyr. Jańa jyldyń aldynda ata-analar komıteti meıramhana taýyp, asabamen de kelisip qoıdy. Qazir shoýdyń barysy men syılyqtar jaǵy túgendelip jatyr. Biz ár adamǵa 54 myń teńgeden jınadyq. Asabanyń qyzmet aqysy da sol qarajattyń ishinde», deıdi astanalyq ata-ana Temirlan Janǵozy.
Qala turǵynynyń aıtýynsha, qarjy jınaý munymen bitpeıdi. Balasyn qatardan qaldyrǵysy kelmegen áke bir aılyq jalaqysyn jumsaǵanyn aıtady.
Lenta – 1500 teńge Albom – 16500 teńge Sýretke 2 obraz – 43000 teńge Kostıým-shalbar – 75000 teńge Muǵalimge syılyq – 10000 teńgeSońǵy qońyraý: Elimizde 215 myńnan astam túlek mekteppen qoshtasty
Astanalyq turǵyn Dana Ábdirahmanova da balasynyń mektep bitirý keshine usaq-túıekti sanamaǵanda 130 myńdaı qarjy jumsaǵan.
«Bir mektep bitirý keshi úshin kóp soma dep oılamaımyn. Qazir bári qymbat. Mektep bitirý keshi balanyń máńgi esinde qalady. Asa ysyrapshyldyq dep oılamaımyn. Bári óz jónimen uıymdastyrylyp jatyr», dedi ol.
Bul ul balalardyń ata-analarynyń shyǵyny. Al qyzdardyki budan qymbat bolary sózsiz. Olardyń bet, tyrnaq árleý jumystarynan bólek, kóılekteriniń ózi qomaqty qarajatqa túsip otyr. Kemi 70-80 myń teńge. Sándi kóılekti bir kúnge jalǵa alǵannyń ózinde osynshama shyǵyn shyǵady.
Budan bólek, mektep túlekteri lımýzın jaldap, otshashý uıymdastyrady. Qazir asabanyń qyzmet aqysy da sharyqtap tur. Baǵa 250 myń teńgeden bastalyp, 1-1,5 mln teńgeden asyp jyǵylady. Árıne, munyń bári ata-ananyń qaltasyna salmaq, biraq balasy úshin eshkim qatardan qalmaq emes.
«Saltanatty keshte 60 adamnan aspasa baǵa 250 myń teńge shamasynda. Eger 2-3 synyp birigip ótkizetin bolsa, sáıkesinshe, qyzmetaqy da qymbattaıdy. Bul qaladaǵy eń arzan baǵa», deıdi asaba Rýslan.
«Dańǵoılyq jármeńkesine aınaldy»: Depýtat mektep bitirý keshterine qyrýar qarjy jınaý týraly
Joǵaryda aıtyp ótkendeı, Oqý-aǵartý mınıstrligi bıyl da bilim berý uıymdarynda mektep bitirý is-sharalaryn ótkizý týraly talaptardy naqtylady. Vedomstvo belgilengen talaptarǵa sáıkes, bitirý keshterin mektepterden tys jerlerde uıymdastyrýǵa jol berilmeıtinin jetkizdi.
«Qabyldanǵan sharalar bilim alýshylardyń qaýipsizdigin qamtamasyz etýdi, olardyń quqyqtaryn qorǵaýdy jáne quqyq buzýshylyqtardyń aldyn alýdy qarastyrady. Attestattardy tabystaý rásimi tek bilim berý uıymdarynyń ǵımarattarynda uıymdastyrylady. Jergilikti atqarýshy organdarǵa qarjylyq shyǵyndardy talap etpeıtin tárbıelik jáne mádenı-aǵartýshylyq is-sharalardy uıymdastyrý jáne túsindirý jumystaryn júrgizý tapsyryldy. Ishki ister organdary tarapynan quqyq buzýshylyqtardyń aldyn alý, qoǵamdyq tártipti saqtaý jáne bilim alýshylardyń qaýipsizdigin qamtamasyz etý boıynsha sharalar tapsyryldy», delingen aqparatta.
Mınıstrlik jylda mektep bitirý keshi toılanbasyn degenmen, ony sán-saltanatymen uıymdastyratyndar jeterlik. Eskertýge qulaq asyp jatqandar az. Az deıtin sebebimiz, mundaı dańǵazalyqqa qarsy mektep túlekteri de bar.
«Men ata-anama tek sońǵy qońyraýǵa qatysyp, toıhanada ótetin bitirý keshine qatyspaıtynymdy aıttym. Alaıda olar meniń bul sheshimime qarsylyq tanytyp otyr. Synypta 30 oqýshynyń 9-y bas tartty. Menińshe, bitirý keshin shaǵyn ortada atap ótý kerek. Al bizdiń bitirý keshimizge 150-deı adam jınalmaq», deıdi jas túlek Mansur Erlan.
100 myńnan astam mektep túlegi elimizdi kógaldandyrýǵa atsalysty
Bul pikirden ata-analardyń da mal shashýǵa beıim turatynyn ańǵarýǵa bolady. Olar balalarynyń bitirý keshi esten ketpesteı bolǵanyn qup kóredi. Alaıda qarajat máselesi sheshilgenimen, qaýipsizdikti de esten shyǵarmaǵan jón.
Aıta keteıik, buǵan deıin atalǵan máselege qatysty Májilis depýtaty Ashat Aımaǵambetov pikir bildirip, elimizdegi kóptegen merekeniń áldeqashan «dańǵoılyq jármeńkesine» aınalyp ketkenin aıtqan bolatyn. Depýtat keıbir otbasylardyń bitirý keshine 300 myńnan bastap, bir mıllıon teńgege deıin aqsha suralatynyna shaǵymdanatynyn aıtty.