13 sáýirde qardyń qarqyndy erýinen Tıýntıýgýr ózeni arnasynan asyp, Qarasý aýdanynyń Qaramyrza aýylynda 39 turǵyn úıdi sý basty, dep habarlaıdy Egemen.kz Qostanaı oblysy TJD baspasóz qyzmetine silteme jasap.
Vedomstvonyń málimetinshe, 13 sáýirde qardyń qarqyndy erýi saldarynan Tıýntıýgýr ózeni arnasynan asqan.
«Qarasý aýdanynyń Qaramyrza aýylynda 39 turǵyn úıdi sý basty, ondaǵy sý deńgeıi 30 sm-ge deıin kóterildi. Tótenshe jaǵdaılar departamentimen jergilikti atqarýshy organdar birigip, zardap shekken halyqty evakýasııalaý uıymdastyryldy. Sý basqan jerden evakýasııalyq pýnktterge 69 adam evakýasııalanyp, negizgi bóligi týystaryna ornalastyryldy. 334 bas iri qara men usaq mal qaýipsiz jerge shyǵaryldy. Qaza bolǵandar men zardap shekkender joq», delingen habarlamada.
Táýlik boıy TJD, JAO kúshteri turǵyn úılerden erigen qar sýyn sorý jumystary júrgizildi. Sý basqan 39 úıdiń ishinen sý tolyǵymen tartyldy. Qazirgi ýaqytta barlyq turǵyndar úılerine oralǵan. Qaramyrza aýylynyń aýmaǵynda sý basqan úıler joq.