Bul kúnderi Polshanyń Kels qalasynda ótip jatqan jastar arasyndaǵy álem birinshiliginiń shırek fınalyna shyqqan boksshylar tolyqtaı anyqtaldy.
60 kılo salmaqta synǵa túsken Elnur Súıinbaı slovakııalyq Adolf Stanekti sabap tastady. Tóreshi kezdesýdi birinshi raýndta toqtatýǵa májbúr boldy. 75 kılo salmaqtaǵy Dıas Moljigitov venesýelalyq Djeremı Aleksandr Alvares Leondy básekeniń basynan aıaǵyna deıin tómpeshtep, kelesi kezeńge esh qınalmaı ótti. Al Sanjar Táshkenbaı (49 kılo), Erbolat Sabyr (56 kılo), Sabyrjan Aqqalyqov (64 kılo) jáne Mádı Ámirov (91 kılo) syndy saıypqyrandar óz jekpe-jekterin aıqyn jeńispen aıaqtaǵany jaıynda biz buǵan deıin de jazǵanbyz. Sóıtip, uldar saıysynda alty órenimiz shırek fınalǵa shyqty.
Qyzdar arasyndaǵy básekede asa aýyr salmaqtaǵy Eldana Tálipova ýkraınalyq Vıktorııa Levchýkty ekinshi raýndta esinen tandyryp, jartylaı fınalǵa joldama aldy. Sondaı-aq, osy jarysqa qatysqan 10 arýymyzdyń taǵy altaýy óz qarsylastaryn qapy qaldyrdy.