Májilis depýtattary ınklıýzıvti bilim berýge qatysty zań jobasyn maquldady, dep habarlaıdy Egemen.kz.
Májilis depýtaty Janat Omarbekova atap ótkendeı, atalǵan qujat múmkindigi shekteýli adamdardyń esh kedergisiz bilim alýyna múmkindik beredi. Onyń aıtýynsha, qazir elimizde erekshe bilim berý qajettilikteri bar 162 myńnan astam bala bar.
Zań jobasy psıhologııalyq-pedagogıkalyq qoldaý qyzmetin qalyptastyrý, erekshe bilim berý qajettilikteri bar balalardy psıhologııalyq-pedagogıkalyq qoldaý boıynsha arnaıy jaǵdaılar jasaýdy reglamentteý boıynsha túzetýlerdi qamtıdy. Bilim alýshynyń damý erekshelikterine baılanysty oqý baǵdarlamalarynyń varıatıvtiligin, ıkemdiligin qamtamasyz etetin normalar engiziledi.
«Zań jobasynda bilim berý uıymy basshysynyń erekshe bilim berý qajettilikteri bar balalar úshin zańnamada kózdelgen arnaıy sharttardy jasamaǵany úshin jaýapkershiligi belgilenedi», dep atap ótti komıtette.