Eńbek jáne halyqty áleýmettik qorǵaý mınıstrligi Eńbek, áleýmettik qorǵaý jáne kóshi-qon komıtetiniń deregi boıynsha, osy jyldyń 1-toqsanynda Qazaqstanda óndiristik jaraqattaný deńgeıi 9,1%-ǵa tómendegen. 2021 jyldyń qańtar-naýryz aılarynda óndiristegi jazataıym oqıǵalardyń saldarynan 310 adam zardap shekti, al ótken jyldyń sáıkes kezeńinde zardap shekkender sany 341 adamdy qurady, dep habarlaıdy Egemen.kz mınıstrliktiń baspasóz qyzmetine silteme jasap.
Bul rette oqys oqıǵalar saldarynan qaza tapqandardyń sany tórtten birge qysqardy: bıyl – 38 adam, al 2020 jyldyń I toqsanynda – 51 adam.
О́ndiristik jaraqattanýdyń joǵary deńgeıi Qaraǵandy (65 adam zardap shekti), Shyǵys Qazaqstan (34 adam), Aqtóbe (29 adam), Qyzylorda (22 adam), Qostanaı (21 adam), Túrkistan (18 adam) jáne Batys Qazaqstan (17 adam) oblystarynda tirkelgen.
Birqatar óńirde I toqsanda óndiristegi jazataıym oqıǵalar saldarynan zardap shekkender sany Aqtóbe oblysynda 25-ten 29 adamǵa deıin, Atyraý oblysynda 6-dan 10 adamǵa deıin, Qyzylorda oblysynda 14-ten 22 adamǵa deıin jáne Pavlodar oblysynda 13-ten 15 adamǵa deıin ósti.
Jazataıym oqıǵalar saldarynan qaza bolǵandar sany 2020 jyldyń uqsas kezeńimen salystyrǵanda Aqtóbe (4-ten 7 adamǵa deıin), Jambyl (2-den 4 adamǵa deıin), Qyzylorda (3-ten 6 adamǵa deıin), Batys Qazaqstan (2-den 3 adamǵa deıin) oblystarynda kóbeıdi.