Kompozıtor Eskendir Hasanǵalıevtiń uly Birjan Hasanǵalıev koronavırýs juqtyrǵan ata-anasynyń qazirgi jaǵdaıyn aıtty, dep habarlaıdy Egemen.kz tengrinews.kz saıtyna silteme jasap.
«Ákemniń jaǵdaıyna qatysty dárigerler keıingi tórt kúndegi kórsetkishterge súıenip, «asa aýyr» degen baǵa berip otyr. Osydan eki jarym jyl buryn ákem júregine kúrdeli ota jasatqan bolatyn, sonyń da áseri bar ma dep oılaımyz. Qazir ol IVL apparatyna qosylǵan. Dárigerlerdiń aıtýynsha, aldaǵy 5-6 kún ishinde jaǵdaıy jaqsaryp qalýy múmkin», dedi Birjan Hasanǵalıev.
Onyń aıtýynsha, anasy Darıko Hasanǵalıevanyń jaǵdaıy jaqsaryp keledi. Jaqyn kúnderi jansaqtaý bóliminen shyǵarylady.
«Búkil halyq bolyp ata-anamnyń tileýin tilep, jyly tilekterin jaýdyryp jatyr, sodan bolar bizde senim paıda boldy. Dál qazirgi armanymyz - ata-anamyzdyń aman-esen ortamyzǵa oralýy», dedi ol.