Senatorlardyń parlamenttik tyńdaý qorytyndysy boıynsha Úkimetke bergen usynymdary qalaı júzege asýda? Búgin Ekonomıkalyq saıasat, ınnovasııalyq damý jáne kásipkerlik komıtetiniń keńeıtilgen otyrysynda memlekettik organdardyń ókilderi óz jumystary týraly Senat depýtattaryna aıtyp berdi, dep habarlaıdy Egemen.kz Senattyń baspasóz qyzmetine silteme jasap.
2020 jyldyń jeltoqsanynda «Jańa jaǵdaıdaǵy ekonomıkalyq damý: Qazaqstanda shaǵyn jáne orta kásipkerlikti qoldaý jáne damytý salasyndaǵy memlekettik saıasatty jáne quqyqtyq retteýdi jetildirý» taqyrybynda ótken parlamenttik tyńdaý barysynda ShOB-ty qoldaý jóninde birqatar mańyzdy usynymdar ázirlengen bolatyn.
Senatorlar usynystarynyń ishinde - shaǵyn jáne orta bıznesti nesıemen qamtýdy keńeıtý jónindegi sharalar ázirleý boldy. Depýtattar oǵan qol jetkizý úshin nesıe berý sharttaryn jumsartyp, kásipkerlerge nesıeni óteý tártibi men kestesin ońtaılandyrýdy usynǵan bolatyn.
Ulttyq ekonomıka mınıstriniń orynbasary Álibek Qýantyrov atqarǵan jumystardyń nátıjesin tanystyrdy. Ol óz baıandamasynda ShOB memlekettik qoldaý sharalaryna taldaý júrgizilgenin jáne olardy mańyz berý jóninde usynystar ázirlengenin habardar etti. Sondaı-aq ekonomıkanyń zardap shekken salalaryndaǵy shaǵyn jáne orta bıznes sýbektilerine keıbir salyqtardy tóleýdi keıinge qaldyrý tártibin engizý múmkindigi qaralyp jatqany aıtyldy.
Indýstrııalyq damý komıtetiniń tóraǵasy Marat Qarabaev senatorlarǵa osy usynystardy iske asyrý qorytyndylary týraly baıandady. Ol búginde memlekettik qoldaý sharalaryn júzege asyrýdyń jańa ádisteri ázirlengenin, sondaı-aq yntalandyrý sharalary kózdelip otyrǵanyn aıtty. Olardyń ishinde syıaqy mólsherlemesin sýbsıdııalaý, aýmaqtyq klasterlerdi qoldaý jáne ónerkásiptik granttardy engizý bar. Bul normalar qazir Parlamentte qaralyp jatqan «О́nerkásiptik saıasat týraly» zań jobasynda belgilenip otyr.
Qarjy, saýda jáne ıntegrasııa mınıstrlikteriniń, sondaı-aq «Atameken» UKP ókilderi de atqarylǵan jumystar týraly aıtyp berdi. Senattyń salalyq komıtetiniń tóraǵasy Dáýren Ádilbekov depýtattardyń usynystary iske asyp jatqanyn, degenmen, ásirese pandemııa kezinde ShOB úshin nesıeni óteý kestesin jeńildetýge qatysty áli de sheshilmegen máseleler bar ekenin atap ótti. Senatorlar osy máselelerdiń bárin erekshe baqylaýda ustaýǵa nıettenip otyr.