Osy jyldan bastap dárilik zattar men medısınalyq buıymdar sapasyn anyqtaý ónimdi deklarasııalaý arqyly saraptama júrgizý jáne qaýiptiligin anyqtaý naryqtan iriktelgen úlgilerdi zerthanalyq synaqtan ótkizýge baılanysty bolyp otyr. Osy sharalar memlekettik tirkeýden keıingi kezeńde farmasevtıkalyq ónimniń sapasyn qamtamasyz etip, Qazaqstan aýmaǵynda falsıfıkattar aınalymyn boldyrmaýǵa baǵyttalady, dep habarlady Egemen.kz.
Preparattar men buıymdar sapasyn baǵalaý merzimi ótinim qabyldanǵan kúnnen bastap kúntizbelik 10 kúnnen 5 jumys kúnine deıin qysqartyldy. Al sanıtarlyq-epıdemııalogııalyq jáne sanıtarlyq-profılaktıkalyq is-sharalar ótkizgende jáne osyǵan oraı shekteýler qoıylǵanda baǵalaý ótinim qabyldanǵan kúnnen bastap 3 jumys kúni ishinde júrgiziledi. Osy ýaqyt aralyǵynda Dárilik zattar men medısınalyq buıymdardy saraptaý ulttyq ortalyǵynyń (DZSUO) mamandary usynylǵan qujattardy, bárinen buryn, farmasevtıkalyq ónimniń sapasy men óndirisin, onyń analıtıkalyq normatıvtik qujattarǵa, dárilik zattar men medısınalyq buıymdardyń memlekettik tizilimine sáıkestigin saraptamadan ótkizedi. Eskertýler bolmaǵan jaǵdaıda ótinim berýshige sáıkestik sertıfıkaty beriledi.
Deklarasııalaý jolymen alynǵan sáıkestik sertıfıkatyn qoldaný kezeńinde DZSUO jyl saıyn ónim úlgileriniń sapasyn rastaý jáne zerthanalyq synaqtar ótkizý maqsatynda naryqtan iriktep alady. Buryn osyndaı rásim ónimniń ár serııasyn, onyń ishinde óndiristi baǵalaý úshin jylyna eki ret júrgizilip keldi.
DZSUO Qaýipsizdik pen sapany baǵalaý departamentiniń dırektory Aısulý Ahımovanyń derekterinshe, byltyrǵy jyly dıstrıbıýtor qoımalarynan jáne dárihanalardan 895 ártúrli preparattar men buıymdardyń iriktep alynǵan. О́tken jyly dáriler men medısınalyq buıymdardyń qaýipsizdigi men sapasy týraly barlyǵy 100 014 qorytyndy jasalsa, onyń 1866 jaǵdaıynda oń nátıjeli qorytyndy berilmegen.
Úlgilerdi irikteý josparyna aıryqsha saqtaý sharttaryn talap etetin, Qazaqstanda tuńǵysh ret tirkelgen sterıldi dárilik zattar jáne parenteraldi engiziletin dáriler, sondaı-aq tegin medısınalyq kómektiń kepildik berilgen kólemi (TMKKK) sheńberindegi jáne mindetti áleýmettik medısınalyq saqtandyrý (MÁMS) júıesinde satyp alynǵan preparattar qamtylady. Medısınalyq buıymdardy tekserýde sterıldi medısınalyq buıymdar jáne jeke qorǵanys quraldary tańdalady. Implantasııalaýǵa jáne in vitro dıagnostıkasyna arnalǵan medısınalyq buıymdar, sondaı-aq medısınalyq tehnıkalar bul tizimge kirmeıdi.
Jospar mindetti túrde óndirýshilermen kelisilip jasaldy. Úlgiler preparattar men buıymdardy óndiretin uıymdarda da, kóterme jáne bólshek saýdada ótkizý oryndarynda, sonymen birge densaýlyq saqtaý uıymdarynda óndirýshi taraptyń qatysýymen alynady. Onyń barysynda ýly, jarylǵysh qaýiptiligi, órt qaýpi, gıgroskopııalyǵy nazarǵa alynady. Aldyn ala saqtaný men lastanýdan saqtandyrý sharalaryn qadaǵalaı otyryp, preparattyń hımııalyq quramy tekserý barysynda ózgeriske túspegeýine kepildik beriledi.