Mamyrdyń 10-y kúni Qyzylorda oblysy Polısııa departamentiniń Esirtki qylmysyna qarsy is-qımyl basqarmasy jedel izdestirý is-sharalaryn júrgizip, oblys ortalyǵynyń turǵyny jarty kelige jýyq esirtki zatyn satqandyǵyn anyqtady, dep habarlaıdy Egemen.kz.
Onyń turǵylyqty meken-jaıyna júrgizilgen tekserý barysynda kópqabatty úıdiń jertólesinen 4 keliden asatyn, avtokóliginde 300 grammǵa jýyq marıhýana saqtaǵandyǵy belgili boldy. Zattaı dáleldemeler alynyp, saraptamaǵa joldandy.
Kúdikti azamat esirtkini qala turǵynynan alǵanyn aıtyp, qazir onyń tıesili ekenin tolyǵymen moıyndady.
Sonymen qatar, kúdiktilerdiń turǵylyqty meken-jaıyna tintý tergeý áreketin júrgizý barysynda gazet qıyndylaryna oralǵan esirtki zattarymen qosa ony tutynýǵa arnalǵan quraldar tabylyp, zattaı dáleldeme retinde alyndy.
Eki kúdikti de Qyzylorda qalalyq Polısııa basqarmasynyń ýaqytsha ustaý abaqtysyna qamaqqa alyndy.
Qazirgi ýaqytta atalǵan esirtki qylmysyna basqa da tulǵalardyń qatystylyǵy tekserilip, Qazaqstan Respýblıkasy Qylmystyq kodeksiniń 297-babynyń 1-bóligi boıynsha sotqa deıingi tergep – tekserý amaldary júrgizilýde.
Qyzylorda oblysy Polısııa departamenti nashaqorlyqqa jáne esirtki bıznesine qarsy kúreske baǵyttalǵan is – sharalardy belsendi túrde jalǵastyrýda.
«Oblys jyl basynan barlyǵy 45 esirtki qylmysy anyqtaldy. Onyń ishinde, esirtki men psıhotroptyq zattardy ótkizý maqsatynsyz zańsyz jumys isteýdiń 33, esirtkini asa iri mólsherde saqtaýdyń 1, ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaýdyń 10, nasıhattaý nemese zańsyz jarnamalaýdyń 1 deregi anyqtaldy. Zańsyz aınalymnan 20 kelige jýyq esirtki tárkilendi», deıdi Qyzylorda oblysy Polısııa departamentiniń bastyǵy, polısııa polkovnıgi Bektóre Sultan.