Tbılısde qazaqtyń uly aqyny ári oıshyly Abaı Qunanbaıuly atyndaǵy dárishana ashyldy. Ashylý saltanatyna Grýzııanyń mádenı jáne ǵylymı orta ókilderi, oqytýshylar, stýdentter men jýrnalıster qatysty, dep habarlaıdy Egemen.kz Syrtqy ister mınıstrligine silteme jasap.
Sýhýmı memlekettik ýnıversıtetinde ashylǵan atalmysh dárishana aqynnyń byltyrǵy 175-jyldyq mereıtoıy sheńberindegi is-sharalardyń biri retinde Grýzııadaǵy Qazaqstan Elshiliginiń jáne Qazaqstan-grýzın mádenı-ekonomıkalyq birlestiginiń qoldaýymen jabdyqtalǵan bolatyn. Dárishana elimiz týraly kitaptarmen, merzimdik basylymdarmen, kompıýterlik tehnıkamen qamtylǵan.
Qazaqstan Elshisi Baýyrjan Muhametjanov óz sózinde atalmysh dárishanany Qazaqstanǵa ashylǵan «terezege» teńeı otyryp, onyń elimiz týraly aqparattyq ortalyqqa aınalatynyna senim bildirdi.
Saltanat barysynda hákim Abaıdyń óleńderin grýzın tiline aýdarǵan Grýzııa jazýshylar odaǵynyń Tóraıymy, tanymal aqyn Makvala Gonashvılıge Prezıdent Qasym-Jomart Toqaevtyń Alǵys haty tabys etildi. Jınalǵandar grýzın oqyrmandarynyń Abaıdyń máńgilik murasymen óz ana tilinde tanysý múmkindigi eki dostas halyqtar arasyndaǵy ózara tartylys pen túsinistikti tereńdete túsetinine senim artty.