Qazaqstannyń Qorǵanys mınıstri general-leıtenant Nurlan Ermekbaev maıdan avıasııasynyń ushqyshy aǵa leıtenant Ardana Botaıdy qabyldady, dep habarlaıdy Egemen.kz Qorǵanys mınıstrligine silteme jasap.
Qorǵanys vedomstvosynyń basshysy Qazaqstanda áskerı-ushqysh mamandyǵyna áıelder daıarlaý múmkindikteri men keleshegi týraly baıandamany tyńdady.
– Názik jandylar árqashan erlerdiń isi sanalatyn áskerı mamandyqty, onyń ishinde áskerı avıasııany da qarqyndy meńgerýde, – dedi ózine senimdi áskerı qyzmetshi.
Aǵa leıtenant Ardana Botaı Qaraǵandy avıasııa bazasynda aǵa joıǵysh-ushqyshy qyzmetin atqarady. Áýede shamamen 500 saǵatqa jýyq ushý tájirıbesi bar.
Bala kúninen áskerı ushqysh bolýdy armandaǵan. Almaty qalasyndaǵy azamattyq avıasııa akademııasynyń «áýe kemeleri men qozǵaltqyshtardy ushýǵa paıdalaný» mamandyǵy boıynsha oqýdy bitirgennen beri ol Qarýly Kúshterdiń sapynda.
Alǵash ret 2018 jyly sáýir aıynda L-39 jaýyngerlik ushaǵymen áýeni sharlaǵan. TL-2000, Tecnam P-2002 asa jeńil ushaqtaryn, Diamond DA42 eki motorly ushaǵyn meńgergen. Qazirgi ýaqytta áskerı qyzmetshi Sý-30SM jańa býyndy joıǵysh ushaǵyn basqarady. Ol áskerı ushqysh joldasy sııaqty komandırlik mansapty armandaıdy.
Qorǵanys mınıstri áıel áskerı qyzmetshilerdiń túrli mamandyqtar boıynsha daıarlyǵy men olardyń Qarýly Kúshterdiń damýyna qosqan úlesiniń mańyzyn atap ótti.