Túrkistan oblysynyń polıseıleri aýlasynda kóknár ekken turǵyndy ustady, dep habarlaıdy Egemen.kz.
Túrkistan oblystyq Polısııa departamenti Esirtki qylmysyna qarsy is-qımyl basqarmasy men Maqtaaral APB-nyń polısııa qyzmetkerleri birlesip, «Dármek» jedel-profılaktıkalyq is-sharasy ótkizýde.
Is-sharanyń negizgi maqsaty – esirtki quraldarynyń, prekýrsorlardyń zańsyz aınalymyna tosqaýyl qoıý, kontrabandalyq ákelý men áketý, sondaı-aq baqylaýdaǵy zattardy zańsyz aınalymǵa shyǵarý derekterin anyqtaý.
Osyndaı shara barysynda iske kirisken aýdandyq polısııa qyzmetkerleri, aýlasyna esirtki zatyna uqsas ósimdikti ósirgen jergilikti turǵyndy ustady. Polıseıler kúdiktiniń aýlasynan 10-nan astam esirtki zatyna uqsas ósimdikti tamyrymen birge topyraqtan shyǵaryp, zattaı dálel retinde aldy. Osylaısha alynǵan zattarǵa saraptama taǵaıyndalyp, nátıjesinde kóknár ekeni belgili boldy.
Sonymen qatar kúdiktiniń budan aldyn QR QK-niń 296-baby (Esirtki, psıhotroptyq zattarmen, sol tektestermen ótkizý maqsatynsyz zańsyz jumys isteý) boıynsha sotty bolǵany anyqtaldy.
Atalǵan jaıt sotqa deıingi tergep-tekserýdiń biryńǵaı tizilimine engizilip, QR QK-niń 300-baby (Quramynda esirtki zattar bar, ósirýge tyıym salynǵan ósimdikterdi zańsyz egip-ósirý) boıynsha qylmystyq is qozǵaldy. Qazirgi tańda osy is boıynsha sot saraptamasy taǵaıyndalyp, tergep-tekserý amaldary júrgizilýde.