Soltústik Qazaqstan oblysy Beskól aýylynyń turǵyndary krannan aqqan sýdy iship ýlanyp jatyr. Sanıtarlyq dárigerler alǵan sý synamasynan onyń mıkrobqa toly ekeni anyqtaldy, dep habarlaıdy Egemen.kz.
Qyzyljar aýdandyq sanıtarııalyq-epıdemıologııalyq baqylaý basqarmasyna aýdandyq aýrýhanadan 105 jedel habarlama túsken. Dárigerler emdeý mekemesine Beskól aýyly turǵyndarynyń qusyp, ystyǵy kóterilip, ishi ótip (dıareıa) kelip jatqanyn aıtqan. Medısına qyzmetkerleri syrqattarǵa «enterovırýsty ınfeksııa» dıagnozyn qoıdy.
«Qazirgi ýaqytta sanıtarııalyq-epıdemıologııalyq qyzmet epıdemııaǵa qarsy jáne aldyn alý is-sharalaryn júrgizip jatyr. Aýyrǵandardyń úıinen jáne Esil ózeni quıatyn kólden sýdyń synamasy alynyp, sanıtarııa-hımııalyq, bakterıologııalyq jáne vırýsologııalyq kórsetkishterge tekserildi.
Nátıjesinde úılerden alynǵan 6 synama bakterıologııalyq kórsetkishter boıynsha oń nátıje kórsetti. Iаǵnı aýyz sý lastanǵan. Qosymsha saraptama taǵaıyndaldy», deıdi Qyzyljar aýdanynyń bas memlekettik sanıtar dárigeri Jangeldi Ibraev.
3 maýsymdaǵy málimet boıynsha, qazir emdeý mekemelerine 18 adam jatqyzylǵan. Onyń bireýi ǵana – eresek. Jaǵdaılary qalypty. Em-dom qabyldap jatyr.
«Jaǵdaı durystalǵanǵa deıin krannan sý ishpeýge keńes beremiz. As-sýǵa tek qana qaınatyp qoldanýǵa bolady. Ishýge bótelkedegi taza sýdy paıdalaný kerek. Sondaı-aq ázirge ashyq sý qoımalarynda sýǵa shomylmaý qajettigin eskertemiz», deıdi Jangeldi Ibraev.
Eske sala ketsek, Soltústik Qazaqstanda jappaı bir aýyl ýlanyp, aýrýhanaǵa túsken edi.