Búgin, 7 maýsymda О́ńirlik kommýnıkasııalar qyzmetiniń onlaın-baspasóz konferensııasy barysynda Almatynyń memlekettik Bas sanıtarlyq dárigeri Jandarbek Bekshın sýburqaqtar arqyly da koronavırýs ınfeksııasyn juqtyrýy múmkin ekenin aıtty, dep habarlaıdy Egemen.kz.
Saıabaqtarda, adam kóp jınalatyn oryndar men bazarlardyń kireberisterine betperde rejımin baqylaý kúsheıtildi. Bul jerlerge betperdesiz kirýge bolmaıdy. Sonymen qatar, turǵyndar radıobaılanys arqyly saıabaqtar men qoǵamdyq oryndarda koronavırýstyń aldyn alý jáne odna qorǵaný sharalary týraly habarlandy. Qalada kórneki úgit jańartylyp, qorǵaný tásilderi, sanıtarlyq qaýipsizdik sharalaryn saqtaý týraly eskertý jasalady. Saıabaqtarda sanıtarlyq patrýlder jumys jasaıdy, monıtorıngtik toptardyń jumysy ózgerdi.
J. Bekshınniń aıtýynsha, sýburqaqtar arqyly tek koronavırýsty ǵana emes, basqa da aýrýlardy juqtyrý múmkin eken. Ol sýburqaqtarda shomylý saldarynan qalada parazıttik aýrýlardyń órshýi tirkelgen jaǵdaıdy eske saldy.
«Sýburqaqtarda shomylýǵa bolmaıdy. Sýburqaqtarda shomylý adamdardyń densaýlyǵyna zııan. Tuman tárizdi áseri bar sýburqaqtar erekshe qaýip tóndiredi. Pandemııa kezinde olardyń jumysy toqtatylady», dedi J. Bekshın.
Almatynyń memlekettik Bas sanıtarlyq dárigeri qalalyq Jasyl ekonomıka basqarmasynyń sýburqaqtar janyna shomylýǵa tyıym salatyn belgiler ornatatynyn aıtty. Sýburqaqtar kúnde dezınfeksııalanady.
Sýburqaqtardyń jumysyn sanıtarlyq dárigerler de, jergilikti atqarýshy organdar da baqylaýǵa aldy. Kásipkerler sanaly azamattyq ustanymdaryn kórsetti. Máselen, Almatydaǵy Dostyq pen Qurmanǵazy kósheleriniń qıylysyndaǵy jeke tuman tárizdi sýburqaq adamdardyń kóp jınalýyna baılanysty jabyldy.