Qazaqstan Prezıdenti Qarjy naryǵyn retteý jáne damytý agenttiginiń tóraǵasy Mádına Ábilqasymovany qabyldady, dep habarlaıdy Egemen.kz Aqordaǵa silteme jasap.
Memleket basshysyna qarjy naryǵynyń damý qorytyndylary men qarjy uıymdaryn retteý jónindegi jumystar týraly baıandaldy.
Kezdesý barysynda qarjy turaqtylyǵyn qamtamasyz etýge baǵyttalǵan sharalarǵa erekshe nazar aýdaryldy. Atap aıtqanda bank, saqtandyrý sektory, qor naryqtary boıynsha turaqty túrde AQR jáne strestik synaqtan ótkizýdi kózdeıtin qadaǵalaý saıasatynyń basymdyqtary ázirlengen.
Qasym-Jomart Toqaevqa strestik aktıvter deńgeıin tómendetý jónindegi qadaǵalaý josparyn bankterdiń oryndaýyna baqylaý jasaý maqsatynda Agenttiktiń qabyldap jatqan sharalary týraly málimet berildi. Sonyń nátıjesinde ótken jarty jylda strestik aktıvterdiń kólemi 15,5 paıyzǵa, ıaǵnı 2,3 trıllıon teńgege deıin azaıdy.
Mádına Ábilqasymovanyń aıtýynsha, qazirgi ekonomıkalyq jaǵdaıda bankterdiń nesıe berý isi ornyqty bolyp otyr. Ekonomıkany nesıeleý kólemi jyl basynan beri 3,3 paıyzǵa artyp, 15,1 trıllıon teńgege jetken.
Memleket basshysy qaryz alýshylardyń quqyǵyn qorǵaý maqsatymen 25 mamyrda bankter men mıkroqarjy uıymdary úshin azamattardyń merzimi ótken bereshegin retteýdiń mindetti tártibin engizýdi kózdeıtin zańǵa qol qoıdy.
Prezıdenttiń tapsyrmasy boıynsha jyldyq tıimdi syıaqy mólsherlemesi saralanyp, kepildik jáne ıpotekalyq kredıtter boıynsha shekti mólsher tómendetildi. Jaǵymsyz nesıelik tarıhy bar boryshkerlerdiń nesıege qoljetimdiligin qalpyna keltirý úshin merzimi ótken nesıeni ótegen qaryz alýshylardy ońaltý tetigi qabyldandy. Búginde 1,4 mıllıon adam qaıtadan qaryz alý quqyǵyna ıe boldy.
Agenttik tóraǵasy Memleket basshysyna mıkroqarjylyq qyzmetti lısenzııalaý aıaqtalǵany týraly baıandady. Jyl basynan beri 1012 nesıe berý uıymy lısenzııa alǵan.
Agenttik tóraǵasy Prezıdentke shaǵyn nesıelerdi berý kezinde klıentterdiń málimetterin qashyqtan sáıkestendirý tetigi kúsheıtilgenin jetkizdi. Bul rette, mindetti túrde bıometrııany tekserý nemese eki faktorly aýtentıfıkattaý arqyly ótkiziledi. Budan bylaı klıentterdi teksermesten shaǵyn nesıelerdi berýge tyıym salynady.
Kezdesý qorytyndysy boıynsha Memleket basshysy Agenttikke ekonomıkalyq ósimdi qaıta qalpyna keltirýde qarjy turaqtylyǵyn saqtaý, qarjy qyzmetteri tutynýshylarynyń quqyqtaryn qorǵaýdy kúsheıtý jáne qarjy naryǵynyń rólin arttyrý jóninde birqatar mindet júktedi.