Ulttyq testileý ortalyǵynyń burynǵy basshysy Dıdar Smaǵulov UBT-dan tym joǵary ball alǵan túlekterdiń kúsheıtilgen tekserýden ótetinin aıtty. Bul týraly ol óziniń Facebook paraqshasynda jazdy, dep habarlaıdy Egemen.kz.
Dıdar Smaǵulovtyń aıtýynsha, Bilim jáne ǵylym mınıstri Ashat Aımaǵambetovtiń tapsyrmasyna oraı, alǵashqy test pen sońǵy nátıjede 20 baldan artyq aıyrmashylyq bolsa, qosymsha tekseris júrgiziledi. Al júıeni aldaǵysy kelgender jaýapkershilikke tartylady.
«Biz júıeni aldaýǵa tyrysqandardyń barlyǵyn anyqtap, tıisinshe jazalaımyz! Bul test tapsyrýshylarǵa ǵana emes, sonymen qatar óńirlerde UBT ótkizýge jaýapty qyzmetkerlerge de qatysty. Sizdiń árbir qadamyńyz bizdiń baqylaýymyzda jáne kez kelgen quqyqbuzýshylyq áreketterge degen talpynys múldem aqylǵa qonymsyz», deıdi Bilim jáne ǵylym mınıstriniń shtattan tys sybaılas jemqorlyqqa qarsy keńesshisi Dıdar Smaǵulov.
Onyń sózinshe, Túrkistan oblysy Temirlan aýylynyń túlegi naýryzdaǵy synaqta 37 ball jınasa, qorytyndy testileýde 121 ball alǵan. Bul kúdik týdyrǵan. Nátıjesinde test qorytyndysyn joıýǵa týra kelgen. Osy rette Smaǵulov alda taǵy da tekserýler bar ekenin, kinálilerdi jaýapkershilikke tartý úshin materıaldar quqyq qorǵaý organdaryna jiberiletinin aıtty.