Qazaqstan Respýblıkasy Aýyl sharýashylyǵy mınıstrliginiń is-áreketinen básekelestikti shekteıtin belgiler anyqtaldy, dep habarlaıdy Egemen.kz.
«Básekelestikti qorǵaý jáne damytý agenttigi (BQDA) qus fabrıkalarynyń ótinishterin qaraý qorytyndylary boıynsha Aýyl sharýashylyǵy mınıstrligine (AShM) qatysty memlekettik organnyń básekelestikke qarsy is-qımyl belgileri boıynsha tergeýdi bastady. Monopolııaǵa qarsy zańnamany QR AShM taýyq jumyrtqasyn óndirýshilerge sýbsıdııalardy bólý kezinde buzǵany anyqtaldy», delingen BQDA habarlamasynda.
Quzyrly vedomstvadaǵylar tergeý nátıjeleri boıynsha tıisti baǵa beriletinin jetkizdi.
«Budan bólek, Básekelestikti qorǵaý jáne damytý agenttigine kelip túsken ótinishtiń negizinde QR AShM Aýyl sharýashylyǵy janýarlaryn sáıkestendirý erejelerine taldaý júrgizildi, onda malǵa arnalǵan sáıkestendirý quraldaryn (qulaq syrǵalaryn) áleýetti jetkizýshilerine qoıylatyn talaptar qamtylǵan. Belgili bolǵandaı, bul Erejeler áleýetti jetkizýshilerdiń memlekettik satyp alýlarǵa qatysýyn shekteıdi, óıtkeni onda aýyl sharýashylyǵy janýarlaryn sáıkestendirý júrgizýge arnalǵan quraldy sertıfıkattalǵan ónimi janýarlar týraly jazbalardy júrgizý jónindegi halyqaralyq uıymnyń (ICAR) ınternet-resýrsynda usynylǵan óndirýshiler daıyndaıdy delingen. Al Qazaqstan naryǵynda ónimderi ICAR ınternet-resýrsynda kórsetilmegen malǵa arnalǵan qulaq syrǵalaryn óndirýshiler bar», deıdi agenttiktiń baspasóz qyzmeti.
Anyqtalǵan faktiler negizinde QR AShM-ǵa monopolııaǵa qarsy zańnamany buzý belgilerin joıý týraly eskertý engizilgeni atap ótiledi.
«Eskertý zańnamada belgilengen merzimde oryndalmaǵan jaǵdaıda Agenttik tergep-tekserýdiń júrgizilýine bastamashylyq etedi», dep atap kórsetti BQDA.