Soltústikqazaqstandyq polıseıler 40 bas jylqyny urlaý isin sotqa joldady, dep habarlaıdy Egemen.kz.
2020 jylǵy 19 qarashada Ýálıhanov aýdanynyń polısııa bólimine shalǵaıdaǵy Qazanǵap aýylynyń turǵynynan erkin jaıylymnan 40 jylqynyń joǵalǵany týraly habarlama túsken. Jábirlenýshi olardy birneshe kún boıy ózi izdegen, keıin ýchaskelik polısııa ınspektoryna júgingen. Keltirilgen shyǵyn somasy 15 mıllıon teńgeden astam.
Atalǵan fakti QR Qylmystyq kodeksiniń 188-1-baby «Mal urlyǵy» boıynsha Sotqa deıingi tergep-tekserýlerdiń biryńǵaı tizilimine engizildi. SQO PD bastyǵynyń orynbasary Rýslan Nazarovtyń aıtýynsha, SQO PD Krımınaldyq polısııa basqarmasy men aýdandyq PB tájirıbeli qyzmetkerleri sanynan jedel-tergeý toby qurylǵan. Mal urlyǵy boıynsha baǵdar oblystyń aýmaqtyq polısııa bólinisteri men elimizdiń Polısııa departamentterine joldanady.
Jedel-izdestirý is-sharalary nátıjesinde uqsas belgileri boıynsha eki jylqy kórshiles Aqmola oblysynyń Zerendi aýdany turǵyndarynyń biriniń qosalqy sharýashylyǵynan tabylǵan. Salynǵan tańba janýarlardyń jábirlenýshige tıesiligin rastady. Odan ári júrgizilgen jedel is-sharalar bul jylqylardy týysyna tastap ketken 53 jastaǵy Býrabaı aýdanynyń izine túsýge múmkindik berdi. Jedel ýákilder istiń mán-jaıyn tarqata kele 35 pen 50 jas aralyǵyndaǵy Aqmola oblysynyń úsh turǵyny men eki soltústikqazaqstandyqty áshkereledi. Kúdiktilerdiń barlyǵy da tabynshylar. Tergeý jarty jyldan astam ýaqytqa sozyldy, ustalǵandar ózderiniń qatystylyǵyn joqqa shyǵaryp, bergen jaýaptaryn birneshe ret ózgertken. Degenmen, jedel-tergeý tobynyń kóp ter tógýiniń arqasynda qylmystyń mán-jaıyn anyqtaý múmkin boldy. Birneshe kún kúdiktiler aýysyp otyryp, urlanǵan jylqylardy Aqmola oblysyna aıdap aparyp, sol jerde bólgen. Qazirgi ýaqytta materıaldar sotqa tapsyryldy.