Elbasy Nursultan Nazarbaevtyń «El úmiti» bastamasy aıasynda aýyl mektepterinde oqyp júrgen balalardy damytý men yntalandyrýǵa baǵyttalǵan jobalar júzege asyrylyp jatyr. Bul týraly Ortalyq kommýnıkasııalar qyzmeti alańynda «Elbasy akademııasy» korporatıvtik qorynyń dırektory Ánýar Janǵozın jan-jaqty maǵlumat berdi.
«El úmiti» bastamasy 2019 jyldan beri qolǵa alyndy. Munyń aıasyndaǵy alǵashqy joba – «Myń bala» ulttyq olımpıadasy. Jobany Nursultan Nazarbaev Qory men Elbasy akademııasy Bilim jáne ǵylym mınıstrliginiń qoldaýymen uıymdastyryp keledi.
Bul olımpıada aýyl mektepterinde oqyp júrgen talantty, qabiletti balalardy iriktep, jeńimpaz bolǵandardyń ári qaraı bilim alýyn tereńdetip oqytatyn arnaýly mektepterde jalǵastyrýyna múmkindik beredi. Aıtalyq, eki jyl ishinde olımpıada 400 myńnan asa oqýshyny qamtyǵan eken. Olardyń barlyǵy – aýyl mektepterinde oqıtyn 5-6-synyp oqýshysy. Búgingi tańda ótken jylǵy joba jeńimpazdarynyń 300-ge jýyǵy daryndy balalarǵa arnalǵan mamandandyrylǵan mektepterde oqyp jatyr. Bul oqýshylardyń qazir úlgerimi de jaqsy eken.
Á.Janǵozınniń aıtýynsha, olımpıadanyń negizgi úsh ustanymy bar: qoljetimdilik, ashyqtyq jáne ınklıýzıvtilik. Kez kelgen aýyl balasyna qoljetimdi bolý úshin olımpıadaǵa tirkeý jáne testileý onlaın ótti. Barlyǵy qalys qalmaı qulaǵdar bolý úshin Elbasy akademııasynyń ıýtýb paraqshasynda vebınarlardy tikeleı efırde ótkizip, olımpıadaǵa tirkeý men qatysý jónindegi barlyq nusqaýlyqtar berildi. Nátıjesinde, 124 myńnan asa qaralym jınady. Osylaısha, sıfrly daǵdylar da qalyptasty. Qyzyǵýshylyq tanytqan balalar ınternetke qosylǵan kez kelgen qurylǵy arqyly sanaýly mınýttar ishinde tirkele aldy. Osylaısha, bıylǵy olımpıadaǵa 4 myńnan asa aýyl mektepterinde oqıtyn 5-6-synyptardyń 150 myńǵa jýyq oqýshysy tirkeldi. Birinshi kezeńde oqýshylar úıde otyryp-aq test tapsyrdy. Al ınternet jyldamdyǵy tómen bolǵandarǵa mektepke baryp tapsyrýǵa múmkindik berildi. Derekterge súıensek, qatysýshylardyń 29%-y planshet pen kompıýter arqyly, 71%-y uıaly telefon arqyly test tapsyrǵan.
– Olımpıadanyń mańyzdy ustanymynyń biri – ashyqtyq. Osy oraıda olımpıadaǵa aýyl balalary ǵana qatysatynyna kóz jetkizgimiz keldi. Sol sebepten alǵash ret Ulttyq bilim berý derekter qorymen qatysýshylardyń aqparattaryn sáıkestendirdik. Oqýshylardyń sońǵy eki jylda aýyl mektebinde oqıtyny tekserildi. Ulttyq bilim berý derekter qorynan tekserý arqyly qatysýshylardyń oblys, aýdan boıynsha nátıjelerine taldaý jasaýǵa múmkindik berildi. Nátıjesi aıqyn bolý úshin test suraqtarynyń jaýaptary ǵalamtordan taba almaıtyndaı etip ázirlendi. Al ekinshi kezeń 5-19 mamyr aralyǵynda oqýshylar barlyq sanıtarlyq-epıdemııalyq talapty saqtaı otyryp, 54 U Study aımaqtyq testileý ortalyqtary bazasynda testileýden ótti. Olımpıada ádil ótýi úshin UBT ótetin ortalyqta ótkizýge sheshim qabyldadyq. Ekinshi kezeńge óńirler bólinisinde eń kóp upaı jınaǵan 4 myńǵa jýyq oqýshy qatysty, – dedi Elbasy akademııasynyń dırektory.
Bıyl olımpıada alǵash ret onlaın formatta ótti. 1 000 jeńimpazdyń 500-i – 5-synyp, 500-i – 6-synyp oqýshylary. 6-synyp jeńimpazdary elimizdiń daryndy balalarǵa arnalǵan jetekshi mektepterinde: respýblıkalyq fızıka-matematıka mektebinde, «Bilim-Innovasııa» lıseılerinde, «Daryn» mamandandyrylǵan mektepterge oqýǵa múmkindik alady. Al 5-synyp boıynsha jeńimpazdardyń Birge Oqý onlaın mektebinde oqyǵannan basqa, kelesi jyly olımpıadanyń ekinshi kezeńine avtomatty túrde qatysa alady.
Birge Oqy onlaın mektebi – bul da Elbasy akademııasynyń aýyl mektepteri oqýshylaryna sapaly bilim berý maqsatynda júzege asyrylyp jatqan kelesi aýqymdy jobasy. Jaqynda ǵana bul onlaın mektep alǵashqy oqý jylyn aıaqtady. Onda «Myń bala» olımpıadasynyń fınalısteri men jeńimpazdary bilim alyp jatyr. Onlaın mektepte oqýshylar sınhrondy formatta ǵana emes, asınhrondy baǵytta da oqı alady. Alǵashynda pikirtalas alańy formatynda bastama alǵan joba, búgin onlaın mektepke deıin keńeıtildi. Pılottyq kezeńde onlaın mektepke «Myń bala» olımpıadasynyń fınalısteri bolǵan 3 myńnan asa aýyl oqýshysy qabyldanǵan. Al qazir 48 topta 1 500-ge jýyq oqýshy bilimin jetildirdi.