Búgin qazaqstandyq tártip saqshylary ózderiniń kásibı merekeleri – polısııa kúnin atap ótýde, dep habarlaıdy Egemen.kz.
Ishki ister mınıstri Erlan Turǵymbaev elimizdiń barlyq polısııa qyzmetkerlerin kásibı merekesimen quttyqtady.
«Qurmetti ardagerler, áriptester! Barshańyzdy Qazaqstan polısııasy kúnimen shyn júrekten quttyqtaımyn. Táýelsizdik alǵaly ishki ister organdarynyń qyzmetkerleri elimizde qoǵamdyq tártipti qamtamasyz etip, azamattardyń quqyqtaryn saqtaý jolynda qyzmet etýde. Memleket basshysy ishki ister organdarynyń jumysyna erekshe kóńil bólip otyr.
Halyqtyń polısııaǵa senimin arttyrý úshin, servıstik modelge kóshý jalǵasýda. Vedomstvolyq bilim berý júıesine reforma júrgizildi. Qyzmetkerlerdiń áleýmettik jáne materıaldyq jaǵdaıy jaqsardy. Jalaqy kóterilip, turǵyn úıge kompensasııa alatyn qyzmetkerler sany ósti. Bul – polısııa qyzmetkerlerinen joǵary jaýapkershilikti jáne qyzmettik mindetterin adal atqarýdy talap etedi.
Tótenshe jaǵdaı men karantın kezinde qyzmetkerler tek ózderiniń tikeleı mindetin atqaryp qana qoımaı, adamdardyń ómiri men densaýlyǵyn qorǵaý úshin dárigerlermen birge aldyńǵy shepte júrdi. Eldegi qaýipsizdikti qamtamasyz etýge bar kúshin salǵan qyzmetkerlerdiń eńbegi joǵary baǵalandy. Táýelsizdik alǵannan bastap, 1,5 myń qyzmetker memlekettik nagradamen marapattaldy. О́kinishke oraı, Táýelsizdik jyldary qyzmettik boryshyn oryndaý kezinde 802 qyzmetker qaza taýyp, 2650 adam jaraqat aldy.
Biz antqa adal bolǵan áriptesterdi eshqashan umytpaımyz. Batyrlarymyzdyń rýhyna máńgilik taǵzym! Ardagerlerimizdiń de polısııanyń damýyna qosqan eńbegi erekshe. Jas qyzmetkerlerdi tárbıelep, jańa formattaǵy polısııanyń beınesin qalyptastyrýǵa qosqan úlesi úshin úlken alǵys bildiremin. Qurmetti ardagerler jáne áriptester! Búgingi kásibı mereke kúni Sizderdiń otbasylaryńyzǵa zor densaýlyq, baqyt pen baılyq, Otanymyz – Qazaqstan Respýblıkasyn órkendetý jolyndaǵy qyzmetterińizge tabys tileımin!», dedi ishki ister mınıstri Erlan Turǵymbaev quttyqtaý sózinde.