Qaraǵandyda alaıaqtyq jasaǵany úshin sanıtarlyq-epıdemıologııalyq baqylaý basqarmasynyń qyzmetkerleri sottaldy, dep habarlaıdy Egemen.kz.
Qazybek bı aýdanynyń sanıtarlyq-epıdemıologııalyq baqylaý basqarmasy bólimderiniń biriniń bas mamandary sot aldynda jaýap berdi. Olar QR QK 190-baby 3-tarmaǵy 2-bóligi «Memlekettik fýnksııalardy oryndaýǵa ýákilettik berilgen adamdar jasaǵan alaıaqtyq» boıynsha aıyptaldy.
Tergeý nusqasy boıynsha, sottalýshylar sóz baılasyp, paıdakúnemdik nıetpen kásipkerdi aldap, ákimshilik quqyq buzdy dep úlken aıyppulmen qorqytyp, aqshasyn ıemdengen. Sonymen qatar sottalýshylardyń ekeýi ákimshilik jaýapkershilikke tartý merziminiń aıaqtalǵanyn bile tura, kásipkerdi shatastyryp, aqshaǵa «máselesin sheship berýge» ýáde etedi. Olar kásipkerden ákimshilik jaýapqa tartylmaǵany úshin 50 myń teńge suraǵan.
Kásipker aldymen sottalýshylarǵa aqsha aýdarǵan, sodan keıin kúdiktenip, sybaılas jemqorlyqqa qarsy qyzmetke júgingen. Osydan soń olar ustaldy.
Sottalýshylardyń biri kinásin tolyq moıyndady, al ekinshisi, kerisinshe, aıyptaýmen kelispeıtinin aıtty.
Qazybek bı aýdandyq soty is boıynsha jınalǵan dálelderdi zerdelep, er adamdardy kináli dep tanydy, olar 2 mıllıon teńge aıyppul tóleýge mindetteldi. Sondaı-aq sot olardy memlekettik qyzmette jumys isteý quqyǵynan birjola aıyrdy.