Qazgıdromet shilde aıynda Qazaqstanda qurǵaqshylyq bolýy múmkin ekenin habarlady, dep jazady Egemen.kz.
«Ázirlengen statıstıkalyq boljamǵa sáıkes shilde aıynda Aqtóbe oblysynyń (Nura, Yrǵyz), Qostanaı (Qarameńdi, Amangeldi), Atyraý (Qulsary) jáne Mańǵystaý oblysynyń (Aqqudyq) jekelegen pýnktterinde ekstremaldy qýańshylyq jaǵdaılar kútiledi» dep habarlady Qazgıdromet.
Aqmola (Esil, Jaqsy, Atbasar), Aqtóbe (Novorossııskoe, Qarabutaq, Basqudyq, Nura, Yrǵyz), Qostanaı (Presnogorkovka, Arshaly, Tobyl, Aralkól, Torǵaı), Soltústik Qazaqstan (Taıynsha) jáne Mańǵystaý oblysynda (Sam) da qatty qýańshylyq bolýy múmkin.
Qazgıdromet boljamyna saı, Aqmola (Balkashıno), Aqtóbe (Komsomolskoe, Temir), Qostanaı (Mıhaılovka, Qarasý, Jitiqara, Qusmuryn, Dıevskaıa, Jeleznodorojnyı), Soltústik Qazaqstan (Iаvlenka, Sergeevka jáne Rýzaevka), Shyǵys Qazaqstan (Lenınogorsk), Jambyl (Qordaı), Almaty (4-shi Aýyl), Qyzylorda (Qazaly) jáne Atyraý oblysynda (Atyraý) ortasha deńgeıdegi qýańshylyq bolady.
«Maýsym aıynyń sońǵy onkúndiginde ótken mol jaýyn-shashynnyń arqasynda, ortasha ylǵaldy jaǵdaılar Batys Qazaqstan oblysynda (Jalpaqtal, Jánibek, Orda), Shyǵys Qazaqstan oblysynda (Baqty) jáne Mańǵystaý oblysynda (Beıneý) boljanady. Qalǵan aýmaqtarda ylǵaldaný sharttary qalypty jaǵdaıǵa jaqyn bolady dep kútilýde» dep jazady baspasóz habarlamasynda.
Aıta keteıik, shilde aıynda elimizdiń soltústik-shyǵys jartysynda jaýyn-shashyn mólsheri normaǵa jýyq bolady dep kútilýde.