Túrikmenstan SIM baspasóz qyzmeti Aýǵanstan shekarasyndaǵy jaǵdaıǵa qatysty málimdeme jasady jáne reseılik BAQ-ty jalǵan aqparat berdi dep aıyptady, dep habarlaıdy Egemen.kz.
Túrikmenstan Syrtqy ister mınıstrligi baspasóz qyzmetiniń málimeti boıynsha, sońǵy kúnderi birqatar reseılik BAQ tarapynan «túrikmen-aýǵan shekarasyndaǵy jaǵdaıǵa qatysty tekserilmegen jáne obektıvti emes habarlamalar» taratylǵan.
«RBK telearnasy Aýǵanstan shekarasyna Túrikmenstannyń áskerı tehnıkasy men artıllerııasyn tartý týraly shyndyqqa janaspaıtyn aqparat taratty. Bul sensasııa úshin jasalǵan jáne basqa eshteńe bildirmeıdi», delingen habarlamada.
Sonymen qatar Túrikmenstan Syrtqy ister mınıstrligi eki kórshi memlekettiń baýyrlastyq qatynasy arqasynda túrikmen-aýǵan shekarasy dostyq pen yntymaqtastyqtyń shekarasy ekenin aıtty.
Túrikmenstan Qorǵanys mınıstrliginiń aqparaty boıynsha, onyń qaramaǵyndaǵy barlyq áskerı bólimshe, olardyń jeke quramy men áskerı tehnıkasy turaqty ornalasqan jerlerde qalady jáne kózdelgen baǵdarlamaǵa sáıkes josparly oqý daıarlyǵyn jalǵastyrady.
«Tatý kórshi dástúrine sáıkes, sondaı-aq ekijaqty kelisimde bekitilgen halyqaralyq quqyq pen mindettemelerdiń myzǵymas qaǵıdattaryn berik oryndaı otyryp, Túrikmenstan baýyrlas Aýǵanstanmen beıbit jáne tatý kórshilik baılanystardy qoldaýǵa jáne nyǵaıtýǵa umtylady», deıdi SIM ókili.